NADAKPAN ang usa ka nagpailang pastor nga gikatahong ig-agaw sa notado kaniadtong druglord sa usa ka buy-bust operation nga gihimo sa kapolisan ug nakuhaan kini og gibanabanang P14 milyones nga balor sa gituohang shabu atol sa buy-bust operation karong bag-o.
Ang operasyon gihimo sa Regional Police Drug Enforcement Unit (RPDEU) sa Barangay Duljo-Fatima sa Dakbayan sa Sugbo nga niresulta sa pagkasikop sa gikonsiderar nga high value target nga si Mark Secretaria Duaban, 42-anyos.
Si Duaban giingong ig-agaw sa kanhi drug lord nga si Rowen “Yawa” Secretaria, kinsa naglihok kaniadto dinhi sa Bohol ug Cebu, apan napatay atol sa operasyon sa kapolisan sa usa sa mga isla dinhi.
Apan sa pakighinabi kang Duaban mihimakak kini nga nalambigit sa ilegal nga drugas diin matod niya nga gitunol ra kaniya sa usa ka bata ang maong ilegal nga drugas ug wa siya masayod kun diin gikan.
Giangkon niya nga dunay nanawag kaniya sa cellphone nga nagpailang supplier apan wala motug-an sa pangalan.
Matud pa niya pastor siya sa ilang relihiyon nga gitawag niining “Maayong Balita” nga iyang nakaplagan sa dihang napriso pa siya kaniadto tungod gihapon sa ilegal nga drugas.
Nasakmit gikan kaniya sa mga otoridad ang dili mominos 2,075 gramos (kapin duha ka kilo) sa gituohang shabu nga gibanabanang mobalor og 14 milyones ka pesos. (RTB)
