GIPAABOT ang mas kusog pa nga ekonomiya sa Bohol ilabi na sa Lungsod sa Ubay human sa pag abli sa Ubay-Cebu-Ubay route sa Cokaliong Shipping.
Gihimo ang Ribbon Cutting kaganiha nga gipangunahan ni Gob. Aris Aumentado, 2nd district Congw. Vanvan Aumentado, Ubay Mayor Costan Reyes, Sangguniang Bayan nga gipangulohan ni Bise Mayor Victor Bonghanoy ug Chester Cokaliong lakip na ang iyang banay.
Suma pa sa tinubdan, dugay nang giplano o gihangyo ni Gob. Aumentado ang Cokaliong Shipping kaniadto sa kongresista pa siya gumikan kay usa sa iyang development agenda ang bangunon ang ekonomiya pinaagi sa mga investments.
Namahayag si Chester Cokaliong nga dakong hagit kanila ang pandemya apan wala kini nakababag kanila sa pagbutang sa barko nga M/V Filipinas Ubay nga kantidad P110M.
Gipaabot nga pagpangandam kini sa pagsulod sa mga dagkong malls dinhi sa Bohol sama sa SM, Robinsons, Puregold ug Gaisano.
Dugang pa ni Congw. Vanvan Aumentado nga gumikan kay 365 ka mga pasahero ug 15-20 ka sakyanan ang makarga sa maong barko dako kini ikatampo sa mas paspas nga paghatud sa mga produkto pasulod/pagawas sa Bohol.
Marso 12, 2023 magsugod ang maiden voyage gikan sa Ubay paingon sa Cebu 8am hagntud 12 sa udto samtang Cebu-Ubay 8pm paingon 12 sa tungang gabie.
Tag P400 ang one way fare niini alang sa mga lokal samtang P440 sa mga turista. (Kahlil Lester O. Camba)
