Ni Wilson Auguis Subrio
SAN VICENTE, Dagohoy — Mao kana ang banat ni Gob. Aris Aumentado ngadto sa mga gustong samok-samukon ang iyang administrasyon o ang gitawag og mga ‘detractors’ ug kritiko.
“Mubo (ubos) ra mo og tan-aw sa Second District. Sleeping giant ang Second District… Wait and see lang,” matud ni Gob. Aris atol sa ceremonial launching sa Dagohoy Solar Power Project niining maong barangay ug lungsod kaniadtong Martes, Septiyembre 27.
Sa katapusang termino sa pagka-kongresista sa anak nga Aumentado ilabina sa gihungihong kini nga moatbang sa gobernador kaniadtong panahona nga si Art Yap, gibiay-biay og ayo ang Segundo Distrito nga maoy pinaka-pobre sa tulo ka distrito.
Tungod sa maong pagsaway sa iyang mga kritiko ilabina sa iyang mga karibal sa politika, gustong pamatud-an ni Gob. Aumentado nga sayop sila sa ilang pagtuo.
Una ng nidepensa ang mga Aumentado sa matawag nga daynastiya niini sa politika sa Segundo Distrito nga, iyang gipadagan si Van-van aron mapadayon ang iyang mga nasugdang proyekto.
Ug karon nga silang duha pulos ana-a sa posisyon, hayag nga suporta ang ihatag sa banang gobernador ngadto sa iyang asawa nga magbabalaod sa iyang nadak-ang distrito.
“More on industrial sa 2nd District ug daghang trabaho mosulod. Sleeping giant ang 2nd District… Wait and see lang,” matud ni Gob. Aris ngadto sa mga walay salig sa iyang liderato.
“Ang nakalahi nato nila (kritiko ug mga karibal sa politika), agresibo ta. Kamao ta mangita og paagi,” ni Aris pa.
Sa taho nga nigawas, sobra na sa 100 ka mga investors ang niduol sa Kagamhanang Probinsyal sa Bohol aron motanyag sa ilang mga serbisyo dinhi sa lalawigan.
Samtang niingon si Aumentado nga ang Puregold nga giingon niya sama sa SM, Robinsons ug Gaisano nga motukod sa ilang negosyo dinhi, moanhi sa Bohol sunod buwan, mobisita sa iyang opisina ug sa kalungsuran.
“Ang Robinson mo-come in pud. Daghan ta og paabuton,” dugang niya.
Suma usab ni Aris, ang ambassador sa Poland magbutang og consular office dinhi sa lalawigan.
“Modaghan ang mga Polish nga mobisita sa Bohol. Makapahimulos ta nila kay mohimo man og mga businesses. Mga kuwartahan man ng mga tawhana,” matud sa gobernador.
“Smart City ang gi-present sa taga-Samsung, sa mga Koreano,” laing maayong balita nga iyang gipaambit sa taga-media.
Gawas usab sa tukurong bilyones nga solar power plant sa Brgy. San Vicente sa lungsod sa Dagohoy, gusto ni Aris nga hatagan og dugang kalambuan ang maong lungsod nga nabutang sa Segundo Distrito.
“Ikaw mayor, mosugot ka nga naay Puregold dinhi sa Dagohoy,” iyang pangutana ni Mayor Germinio”Hermie” C. Relampagos, MD.
Nitubag si Mayor Hermie, “Kinasugutan.”
Niingon usab si Relampagos nga iyang tabangan nga makasulod ang dugang mga investors sa iyang lungsod.
