GIPANAWAGAN sa labaw nga bokal sa tibook Bohol ang pag-aprubar sa Kongreso kalabot sa sugyot-balaudnon nga ilhon ang mga barangay health workers (BHW) isip mga empleyado usab sa gobyerno.
Gipasabot ni Bokal Tita V. Baja nga ang mga BHW tinuod nga mga frontliners sa pakig-giyera batok sa pandemya apan sila wala nakadawat og husto nga kompensasyon.
Matod pa sa babayeng bokal gikan sa ikatulong distrito nga sama karon kung walay BHWs, daghang malnutrition, daghang kabalayan nga wala makahibalo nga dunay mga doktor, labi na sa mga barangay nga unreachable o dili daling maadtuan diin ang mga BHWs lang ang gilauman.
Sigon niini nga hangtud karon nag-ung-ong pa sa Kongreso ang House Bill No. 10112 nga gipangamahan kaniadto ni Speaker ug karon Senador Cayetano.
Gipasabot pa ni SBM Baja nga tumong sa maong balaudnon nga mahatagan ang mga BHW sa ilang job-order, contractual o regular employees man sa us aka LGU. (RTB)
