NIISYU ang Department of Tourism (DOT) niisyu og memorandum circular nga dili na kinahanglan ang pagpresentar og pruweba sa full vaccination ingon man ang pagwagtang sa polisiya sa pagsul-ob og face mask diha sa tourism establishments.
Ang DOT memorandum circular (MC) 2023-0002 kabahin kini sa mga lakang aron suportahan ang pagpaloag sa nasudnong kagamhanan sa mga restriction nga adunay kalabotan sa COVID-19.
Matud ni Tourism Secretary Christina Garcia Frasco nga kabahin kini sa mga lakang sa iyang departamento aron matabangan and stakeholders sa turismo gikan sa ekonomikanhong kalisod .
Sa laing bahin, ang Department of Trade and Industry (DTI) Safety Seal Secretariat nipahibalo sa paghunong sa Safety Seal Certification Program.
“This latest issuance on the relaxed health and safety guidelines for tourism establishments reinforces the Department of Tourism’s commitment towards addressing the economic hardships of the tourism industry brought about by the lockdowns and restrictions of the pandemic. It sends the important message across that, under the Marcos administration, our country is open for tourism, and that we are keeping up with global practices on tourism operations that have already opened up worldwide”, matud ni Frasco .
Pinaagi sa DOT MC 2023-0002, gimando sa DOT ang pagtangtang sa naunang rekisitos kaniadto sa establisemento sa turismo sama sa pagbutang og plastic, acrylic barriers ug dividers sa mga designated areas.
Isip pagsunod sa mga pagbag-o sa polisiya sa nasud sa minimum public health standards, gipahibalo usab sa DOT nga dili na nila iisyu ang PH Safety Seal ug WTTC Safe Travels Stamp (STS) sa mga negosyo sa turismo nga subay kaniadto sa Joint Memorandum Circular No. 21-01 nga giisyu sa DOT ug uban pang ahensiya sa nasudnong kagamhanan.
Nasayran nga sa pagsumite sa binuwan nga mga taho sa regional offices sa DOT ang accommodation establishments (AE) dili na kinahanglan nga ilakip ang gidaghanon sa nature of work ug gidugayon sa pagpuyo sa mga gitugotan nga bisita ingon man ang mga ngalan sa mga kompaniya o negosyo sa mga empleyado nga gi-book sa establisamento. (RTB)
