GIPANG-APOD-APOD nga sample ballot sa Balilihan, promotional material lang ug dili angay kabalak-an kay dili kini official ballot.
Kini ang giklaro ni Atty. Trisha Chatto, kinsa nikandidato pagka-bise mayor sa lungsod sa Balilihan alang sa umaabot eleksyon.
Ang pagpatin-aw ni Atty. Chatto, nga anak nila ni Cong. Edgar Chatto sa 1st Dist sa Bohol ug Balilihan Mayor Pureza Veloso-Chatto, giluwatan human gi-post sa Facebook ang naasoy’ng sample ballot nga nagtangag sa mga ngalan sa mga kandidato ubos sa bando sa Padayon Bol-anon-Balilihan.
Matod sa batan-ong Chatto nga sa kada eleksyon naa man gyud nang sample ballot kay mura man na og giya sa mga pumipili, pero wala na magpasabot nga nahuman na ang eleksyon sa Balilihan.
Gusto lang niyang i-korek ang mga ingon niini nga insinuation kay makalibog ni sa mga tawo.
Sa social media, gitabangan og komentaryo ang retrato sa sample ballot ug duna pay nangutana kon nganong wala maapil ang pangalan sa ubang kandidato.
“Kanang sample ballot pareha ra na sa mga tarpaulin nga atong makita sa daplin sa kadalanan. Promotional material ra na,” dugang pasabot ni Atty. Chatto.
Matod niya nga ang ilang sample ballot black ink ang printa samtang ang official ballot sa Comelec, colored na. (RTB)
