BISAN tuod kining atong lindog dili kabahin sa Pulitika ug Ekonomiya, aduna gihapoy gitawag og Culture of Leadership o kultura sa liderato nga mahimo natong hisgutan. Dili kita mangangkon nga kita usa ka maayong lider. Sa pagkatinuod, daghan pa kitag angayng makat-onan. Apan isip usa ka manunulat aduna kitay kagawasan pagpadayag sa atong opinyon.
Usa ka adlaw niana adunay pipila ka empleyadong nanagtapok sa lobby sa ilang opisina ug milabay ang usa ka lider. Giunhan silag tagad. Miingon ang mga empleyado, “Lahi na gyud kaayo ron, no”? Gikomparar sa mga empleyado ang maong lider sa ilang kanhi nailhang laing lider. Dili kalikayan ang mga ingon-niining mga kahigayonan, ilabi na matag tulo ka tuig nga bag-o ang mamunoan.
Adunay mga lider nga tistisan. Adunay mga lider nga hinagdanon. Duol sila sa katawhan. May mga lider usab nga gusto silang kahadlokan. Gusto silang magpatahud. Matud sa mga eksperto sa siyensya sa pamunoan kon science of leadership, mahimong atong isulti nga duha ra ang klase sa mga lider, kadtong gustong higugmaon ug kadtong gustong kahadlokan. Managlahi ang ilang diskarte apan posibleng usa ra ang ilang katuyuan.
Ang mga empleyadong nahiagum sa pagpangyam-id sa lider kanhi, misumbong ngadto sa bag-ong lider nga gihigugma ug mahigugmaon sa katawhan, og mikomentaryo ang bag-ong lider: “Pasagdi lang ninyo. Ang tawo ganing maghawud-hawud, Ginoo nay mopaubos ana. Dugay na man unta na silang nanga-lider ambut nganong insecure man gihapon. Patahud man jamo”.
Di na tingale ta angay modugang pa sa maong komentaryo. Sa Iningles pa, self-explanatory. Ato na lang ipa-ambit kining panultihon gikan kang George Van Valkenburg: “Ang liderato mao ang pagbuhat sa husto bisan walay nagtan-aw. Kanang pagbuhat og husto tungod kay naay nagtan-aw, pulitika kana”. Kamo nay hubad ana.
