‘NATURE’ kuno sa tawo ang pagka-imperpekto — kay lage makasasala man. Hinuon, tinuod man pud.
Ana-a ka ba’y kaila nga bintahuso kaayo? Kanang akup-akupon: ma-butang man, kabtangan, bahandi, salapi, yuta, gahum, sa relasyon ug uban pa. Ako, anaay daghan.
Daghan ang maka-relate niining maong istorya.
Diha sa atong panimalay, ana-a usahay ang atong pagka-bintahuso. Pananglitan, sa pagkaon sama sa sud-an. Kon dili gani magkadungan og kaon, luoy ang maulahi kay gamay na lang ang mahabilin nga sud-an o uban pa’ng pagkaon. Pait kon dili gayud mabinlan kay nakalimtan o wa g’yud binli.
Sa amua, sinati nako kini ilabina anaay panahon nga ako o ang ubang sakop sa pamilya, gipanggutom, samot na kon lami ang sud-an o mga pagkaon sa lamesa.
Ang sangputan, kon dili man magyawyaw, moabot pa sa punto nga magkaaway ilabina kon mga bata pa. O di kaha, magbinawsanay. Sa makauna lang.
Hinuon, ok ra kana. Dili man kaayo bug-at nga istorya. Mabug-at lang siguro kon kanunay mahitabo.
Kining sa mga butang o kabtangan, daghan usab ang akup-akupon o bintahuso. Kon ang usa gani makaangay sa usa ka butang, iya kining kuhaon, pinugos o di ba kaha, kawaton.
Kining kabtangan, bahandi, salapi ug yuta, mao usab ang kasagarang maapil sa istorya kon maghisgot kita og bintahuso.
Bisan siguro kamo nga nagbasa, anaay mga kasinatian niini, sa igsoon man o ubang sakop sa banay. Usahay kon mo-grabe, moabot pa sa punto nga magdinumtanay o magpatay ilabina kon yuta o kuwarta isyu.
Kining yuta, dili ra ba madala inig hawa nato niining kalibutana. Kay gikan man kita sa abo, mobalik gayud kita sa pagka-abo.
Kini maoy kasagarang hinungdan sa mga panagbangi o away. Daghan ko’g kasinatian niini. Sakit hunahunaon nga magbungol na lang tungod sa yuta o kalibutanong kabtangan.
Ang kuwarta usab, maoy pinakagrabe sa tanan. Mahimo ng ginoo alang sa uban. Maoy ilang yukbuan. Mausab ang pagkatawo. Mahimong itom ang galamhan.
Kining pagka-bintahuso sa gahum, mao usab kini usa sa mga sikat nga hisgutanan.
Kini bisan sa sulod sa panimalay, atong makita. Pananglitan, ang maguwang, magpaka-maguwang gayud kana. Dili gusto nga malupig sa mga manghud. Magamit ang garbo.
Sa mga anaay uyab o minyo na, ayaw dobleha o daghana ang inyong gihigugma, kay “too much love will kill you” ra ba kuno, matud pa sa kanta.
Pagbaton og pagka-kontento. Ayaw gub-a ang pagsalig sa imong uyab o asawa o bana, ilabina kon anaay mga anak. Luoy.
Sa dili pa mosulod og relasyon ilabina ang kaminyoon, hinuktoki sa makadaghang higayon kon siya na ba gayud ang imong gustong makauban sa hangtud.
Ug kon dili gani, ihunong na kana aron walay mga dughan nga masakitan. Pili-a kon kinsa gayud ang tinud-anay nga gipitik sa imong kasing-kasing. Ayaw pagdali aron dili magmahay.
Laing maapil sa bintahuso kanang sa posisyon sa trabaho diha sa mga pribadong kompanya. Ana-a ang palakasay o magsinipsip.
Apan mas grabe niini ang mga ana-a sa gobyerno ilabina ang mga politiko.
Daghan ng nanggungis sa maong kalibutan apan nagpabilin pa gihapon kay gihimo ng panginabuhian o negosyo ang pagka-politiko.
Kon buot hunahunaon ra ba unta, dili na gayud angayan ilabina kon tiguwang na gayud. Garbo na lang ang nagpabilin. Dili na maayo.
Pero kon gikinahanglan ang serbisyo, aw balik sa pag-alagad sa katawhan. Kon dili na, pahuway na ilabina kon nakabilin na og maayong legasiya.
Atong hinumduman ilabina nagkaduol ang Disyembre 25 — ang Pasko, dili nato pakamatyan ang mga kalibutanong kalipay sama sa bahandi, salapi ug gahum o tanang materyal o lumalabay lang.
Pagbaton sa pagka-manggihatagon. Kon imo ng nakuptan ang maong gahum, daghan na ka og salapi o bahandi, kon dili na kinahanglan ang imong serbisyo o ang maong mga kabtangan, isalig ug ihatag sa uban. Kay lage, hinuwaman ra nato ang tanan. I mean, gipiyal lang kanato.
Kon bintahuso ka, kon hakog ka ug kon buaya ka, hununga na kana. Pagbag-o na. Dili pa ulahi ang tanan. Gani, alang kanako, dili pa ulahi ang tanan kon kamao kita modawat og mga kasaypanan, kon kamao kita mangayo og pasaylo o mopasaylo. Hinaot pa.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
