GIBUTYAG ni Gob. Erico Aristotle Aumentado nga sa sunod tuig makadawat ang 1,109 ka barangay sa Bohol sa tag P200,000 apan gumikan sa pagkunhod sa National Tax Allocation, pagahimuon kini “by batches” kada tuig.
Buot pasabot niini, dili dunganon kini paghatag sa tanang barangay. Iyang giklaro nga sa dili pa mahuman ang unang termino niya isip amahan sa Bohol, maapod-apod na ang tag P200,000.
Nitambong usab ang amahan sa Local Government Affairs nga si Oscar Valles apil na si kanhi Mabini mayor Stephen Rances.
Gitapok atol maong kalihokan ang mga pangulo sa BALA, BHWs ug mga Tanod sa tanang barangay ug nakadawat sa mga nagkadaiyang mga kaayohan isip pasiunang pinaskohan.
Matud pa ni Valles nga ang mga barangay, makadawat sa tag P25,000 bisan pa nga duna pa sila nga “unliquidated” .
Ang maong pag-anunsyo ni Gob. Aumentado gihimo atol sa gipahigayong Meet and Greet didto sa Lungsod sa Valencia.
Dunay mga pagpanghatag usab sa Barangay Officials Aid kon diin mapasalamaton sila Gob. Aumentado, Mayor Balite ug mga elected officials ngadto kanila gumikan kay sila man ang “frontliners” ilabi na sa mga kalamidad ug uban pa.
Ang maong lungsod kasamtangang gipangulohan ni Engr. Dionisio Neil A. Balite, Ph.D isip mayor ug mao usab kini ang “hometown” nila Bise Gob. Dionisio Victor A. Balite, Ph.D ug kanhi Bise Gob, Atty. Dionisio “Dioning” D. Balite, Ph.D.
Mapasalamaton si Bise Mayor Aristotle ‘Dondon” Cometa ngadto kang Mayor Balite sa walay puas nga suporta sa mga buhatan sa ilang Balay Lungsod. (Kahlil Lester O. Camba)
