KASAGARAN sa mga sad-an, gahi og mga galamhan. Lisod bungkagon. Mabungkag man pero dugay.
Taas nga panahon ang gikinahanglan.
Ang kahimtang sa korapsyon sa Pilipinas gilambigit sa usa ka ngilngig nga suliran sa mga huyang og kasing-kasing ug panumduman ug ilabina sa ispirituhanong aspeto.
Suma pa sa mga kabus ug dinaug-daug, “Unta sila na lang ang nmatay, mmatay! Sila na lang unta ang g*kuha! Silang mga dagko’g sala!”
Samtang nagtabi mi sa akong kauban sa media ug nakahisgot kabahin sa ‘depresyon’, nisangpot ang kabahin sa korapsyon ug ubang matang sa pagpangawat o pagpangawkaw, ilabina sa mga opisyales sa gobyerno, mga pulitiko lakip na ang appointed officials.
Matud niya, “Bitaw, sila na lang unta ang nahiagum sa maong kapalaran,” akong pagsabot sa iyang gisulti.
Kasagaran sa depresyon kondili mahapuhap o dili mabantayan, mga kinabuhi ang masayang.
Bantayanan ang maong problema kay sa usa ka sayop nga lakang, maputol ang mga kaugmaon, maayo untang kaugmaon nga gilaraw.
Sa prangka, mapugngan unta ang maong sakit nga mga panghitabo ilabina padayon kitang nakigtigi niining krisis karon sa panglawas.
Niabot sa punto ang akong kauban sa maong pamalikas o panungo tungod sa nagkagrabeng korapsyon sa nasud Pilipinhon ilabina dinhi sa Bohol.
Nga unta sila nga mga sad-an mao na lang unta ang nitapos sa ilang kinabuhi tungod sa kauwaw sa kontrobersiya nga ilang gikalambigitan.
Pero susama nga wala sila nadutlan o natandog sa ilang giatubang nga mga pasumangil ilabina kadtong dayag gayud nga mga sad-an.
Nagpakabungol na lang sa mga hait nga pagsaway bisan apektado na ang ilang mga pamilya.
Ang pait sa atong mga lider sa gobyerno dinhi kay bisan sad-an na, muingon gihapon nga “Prove it in the court!” Mangayo dayon og ebidensya. I-rason ang balaod.
Gi-take advantage lage pud ang kahabol ug kahuyang sa pamalaod ug hustisya niining demokratikong nasud.
Sa Japan, ang ilang mga lider didto kon mapildi sa giyera, mag-atubang og mga bug-at nga isyu, kasagaran moputol sa ilang mga ginhawa tungod sa tumang kauwaw. Nahimo ng parte sa ilang tradisyon ug kultura.
Dinhi, pabaga gihapon sa nawong. Mao pa’y isog. Muingon na lang ang mga karaan, “Susmaryosep!”
Gikaon na kita sa sistema sa pamolitika ug pang-gobyerno ug mas mogara ra ba panahon sa grabeng kalisdanan.
Makaingon na lang ta, gahi pa’s bato og mga galamhan mga tawhana. Asero siguro sa kagahi o nagpagahi-gahi lang gayud ang uban tungod sa garbo ug dungog kuno, dungog nga giampingan.
Ambot lang.
Ato na silang i-ampo kay wala sila masayod sa ilang gibuhat. Nasayod man gani nagpadayon lang gihapon kay gitukob sa impluwensiya sa gahum ug salapi. Ug unta pasayluon sa Labaw’ng Makagagahum kon kaya pa’ng pasayluon.
Kita bisan nagkamang na ang kalisod ilabina sa mga kabus, padayon sa pagbuhat sa maayo ilabina ang mga gipanglutos sa mga abusado sa katilingban.
Ug kitang mga nagginhawa pa ug kaya pa’ng makigbisog sa kinabuhi, sukol sa mga hagit niini.
Pagpakalig-on ug sa kanunay ayaw pagpakawala sa paglaum.
Kining lindog: ‘Tingog sa Kabatan-onan’, abli inyong mga sugyot ug komento. Mamahimo kana ninyong mapaabot pinaagi niining akong numero 09638753562 o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
