MAGPADAYON ang way puas nga lakang sa pagpaus-os sa presyo sa isda hangtod nga makaabot ang suplay sa nagkadaiyang merkado publiko sa tibook Bohol ug dili lang sa Old Tagbilaran City Airport.
Si kanhi Loboc Mayor Leon Calipusan nga naa sa frontline niini nga adbokasiya miingon nga ang core group nga nagdumala sa pagsulod sa dugang nga mga suplay sa isda nagtarget sa Disyembre karong tuiga ma operational na ang distribution chain.
Matod niya ang gipaabot nga operasyon sa usa ka dako nga refrigerated van nga nabutang karon sa karaang City Airport gipunting karong bag-o tungod kay ang mga gikinahanglan nga koneksyon sa kuryente gimando nga himuon nga labing paspas nga mahimo kini. Ang van maka-akomodar og 15 ka toneladang isda ug ubang mga pagkaong-dagat.
Sayo sa nakalabay nga semana, ang mga suplay sa isda gikan sa Zamboanga City ug gikan sa Talibon area gibaligya sa mas ubos nga presyo nga maoy hinungdan nga ang presyo sa isda sa Fish Terminal sa Causeway Drive kinahanglan usab nga pakunhuran aron makigkompetensya niini sa airport.
Ang unang shipment sa suplay sa isda gikan sa Zamboanga mipaus-os sa borot-borot nga isda ngadto sa P170 matag kilo ug P160 sa nagkadaiyang merkado sa dakbayan.
Matod ni Calipusan nga ang Task Force Isda nagsugod na sa “negotiation” sa mga suppliers sa isda sa Pasil, Cebu nga maoy dakong baligyaanan sa isda sa tibuok Central Visayas.
Ang ubang gipuntirya nga mga suppliers anaa sa Plaridel ug General Santos, sigon sa kanhi mayor sa Loboc. (RTB)
