BALIK-Kapitolyo na si Gobernador Aris Aumentado, Mayo 28, human gipahigayon ang mga lakaw sa gawas sa nasod.
Isip chairman sa Provincial Development Council (PDC) gipanguluhan niini ang Executive Committee (ExeCom)Meeting nga gipahigayon didto sa Kapitolyo.
Uban sa presensya ni Provincial Administrator Asteria Caberte, Provincial Planning and Development Office (PPDO) nga gipanguluhan ni Atty. John Titus Vistal, Bohol Economic Development and Investment Promotion Office (BEDIPO) nga gipanguluhan ni Maria Fe Dominise, mga representante sa Department of Environment and Natural Resources (DENR), National Power Corporation (NPC), ug uban pang mga stakeholders; giaprobahan sa Gobernador ang upat ka agenda ug gi-endorso pinaagi sa PDC aron ma-implementar kini dayon sa Pangagamhanan.
Unang giaprobahan mao ang proposal nga Resilient Inter-connectivity through Non-fixed Broadband (satellite-based internet) Communication Powered with Green Technology para sa mga buhatan sa Kagamhanang Probinsyal ug sa napulo ka mga pampublikong hospital sa lalawigan.
Kalakip nga giaprobahan ang gipresentar ni NPC Engr. Armie Azucenas kabahin sa ilang gikinahanglan nga Memorandum of Agreement (MOA) alang sa ER1-94 pinaagi sa National Power Corporation (NPC) ug Small Power Utilities Group (SPUG).
Tumong sa MOA nga mapatuman ang mando sa Department of Energy (DOE) ER1-94 nga ang komunidad diin adunay energy generating facility sa ilang dapit, angay nga makadawat sa pinansyal nga benepisyo, pinaagi sa mga tangible projects
Sa laing bahin, giaprobahan usab ni Gobernador Aris Aumentado ang hangyo alang sa endorsement sa gipresentar ni Glicerita Racho; usa ka CENR Officer sa DENR-CENRO Tagbilaran nga proposal alang sa modification of boundaries o pag-usab sa mga utlanan sa Cabilao-Sandingan Island Mangrove Swamp Forest Reserve (CSIMSFR) nga adunay sukod 2,661.470 ka ektarya ngadto sa kategorya nga Protected Landscape and Seascape ubos sa Expanded National Integrated Protected Area System (ENIPAS) Act sa sukod nga 156.912 ka ektarya na lamang. Alang kini sa duha ka isla sa Loon.
Gideklarar kini Disyembre 29, 1981 isip usa ka CSIMSFR pinaagi sa PP No. 2152. Kini nahimong kasangkapan sa enactment RA 7586 o NIPAS Act of 1992 ug giamyemdahan isip ENIPAS Act of 2018.
Tuig 2018 ang DENR nagpahigayon usab og Protected Area Suitability Assessment (PASA) diin tuig 2021 nakabaton kini sa regional review.
Sa laing bahin si Congressman Edgar Chatto miduso kaniadto sa House Bill No.10429 nga nagdeklarar sa 599.43 ka ektarya nga gilangkob sa Isla Cabilao ug Sandingan isip Protected Seascape.
Sa PAMB meeting Oct. 31, 2024; Public Consultation December 4, 2024 ug Special PAMB Meeting April 11, 2025 didto sa maong mga isla, gikahiusahan ang amendments, nga imbes 599 ka ektarya ang ideklarar nga Protected Area, ang sukod nga 156.912 lamang ka ektarya ang isipon nga protected area sa kategorya nga Protected Landscape and Seascape ubos sa Expanded National Integrated Protected Area System (ENIPAS) Act .
Gikalipay ni Aumentado nga subay sa modification sa demarcation, ang mga mangroves lang ug ang mga bahandi sa kadagatan ang gideklarar nga protected landscape and seascapes.
Ang maong lakang magsulbad sa problema sa katawhan sa Sandingan ug Cabilao Island, Loon kabahin sa ilang mga yangongo sa lisod nga proseso kung aduna silay tukuron nga edipisyo sa ilang agricultural o residential nga yuta.
Giaprobahan kini sa PDC uban ang endorsement niini ngadto sa Regional Development Council (RDC).
“Kung maaprobahan na kining maong balaodnon, magpasayon na unya kini sa mga taga Sandingan ug Cabilao sa ilang pagpatukod og mga imprastraktura kay dili naman maapil ang mga agricultural ug residential land sa ENIPAS Act” matud sa Gobernador.
Si PA Caberte mipasabot kang Dominise, nga angay pangandaman ang nagkadaghan na unya nga oportunidad alang sa investment sa kaislahan sa Loon, kung dili na ang tibuok Sandingan ug Cabilao, ang ubos sa ENIPAS Act.
Makahimo na unya pagpatitulo ang katawhan nga adunay yuta, ug makapabalhin sa pangalan sa titulo ngadto sa bag-ong tag-iya niini ang mga dugay na nagtinguha ning maong kalamboan. (RTB)
