OPISYAL nang gi-aprubahan sa Provincial Disaster Risk Reduction and Management Council (PDRRMC) ang pagpahigayon sa cloud seeding operations dinhi sa lalawigan. Kini usa sa mga nag-unang lakang ug pagpangandam sa kagamhanan aron maminusan ug masumpayan ang gilaoman nga grabeng epekto sa super El Niño sa umaabot nga mga bulan.
Ang maong desisyon gihimo atol sa tigom sa konseho alang sa ikaduhang kwarter sa tuig, nga gipahigayon sa New Capitol niadtong Mayo 28. Gipangulohan kini ni Provincial Administrator Aster Caberte, isip representante ni Governor Aris Aumentado.
Sumala pa kang Anthony Damalerio, pangulo sa Provincial Disaster Risk Reduction and Management Office (PDRRMO), adunay nahimutang ug andam na nga ₱5 milyones nga pondo nga kuhaon gikan sa disaster funds sa probinsya aron magamit sa maong operasyon.
Dugang pa niya, hugot nga makigtambayayong ug makig-alayon ang PDRRMC sa Bureau of Soils and Water Management (BSWM) alang sa saktong pagpatuman sa maong programa. Ang maong ahensya usab ang nagrekomendar sa pagpahigayon niini, ug gilauman usab nga makakuha og dugang suporta o pondo gikan kanila.
Karon nga napasar na ang sugyot, gipahibalo ni Damalerio nga magpokus na dayon ang kagamhanan sa pagpalit sa mga gikinahanglang materyales ug pag-andam sa tanang butang. Gihimo kini aron masiguro nga hapsay ug walay kalangan ang pagsugod sa operasyon sa higayon nga gikinahanglan na kini ipatuman.
Gihisgutan usab ug gituki sa tigom ang kasamtangang kahimtang sa kainit ug ang posibleng epekto sa El Niño sa agrikultura, suplay sa tubig, panglawas, ug kinatibuk-ang kahimtang sa probinsya.
Gipresentar ang tagsa-tagsa ka taho gikan sa PAGASA, Office of the Provincial Agriculturist, National Irrigation Administration, Office of the Provincial Veterinarian, PDRRMO, Provincial Health Office, DILG, ug Provincial Budget Office.
Isip dugang lakang sa pag-andam, gi-aprubahan usab sa konseho ang Enhanced Local DRRM Plan — ang giusab ug gipalig-on nga plano sa probinsya nga magsilbing giya gikan tuig 2026 hangtod 2031. (RTB)
