DUHA ka mga buhatan sa lokal nga kagamhanan sa Ubay niadtong Miyerkules nirekomendar sa Sangguniang Bayan (SB) sa lungsod nga ipaubos sa state of calamity ang munisipyo aron mapalig-on ang mga paningkamot batok sa pagkaylap sa African Swine Fever (ASF).
Ang Ubay Municipal Disaster Risk Reduction and Management Office (MDRRMO) ug Municipal Agriculture Office mipresentar og datos nga nagpakita nga ang virus mikaylap sa tulo ka barangay sa first-class nga munisipyo.
Matod ni Municipal Agriculturist Marianito Doydora, kwalipikado na ang lungsod nga ipaubos sa state of calamity base sa guidelines sa National Disaster Risk Reduction and Management Council (NDRRMC).
Ang NDRRMC Memorandum Order No. 60 (2019) nag-ingon nga kung ang kaylap nga pagkaguba sa kahayupan makaapekto sa duha o daghan pa nga mga barangay, ang SB, sa rekomendasyon sa MDRRMO, mahimong magdeklarar sa tibuok lungsod ubos sa state of calamity.
“Mao pud niy request sa 10 ka mga barangays including sa mga adjacent na mga barangay na suportahan sila financially ilabina sa checkpoints ug upan pang mga logistics mao ng mi duol gyud mi sa Sanggunian na ilang ideklarar ang [State of Calamity] kay usa ni sa makatabang aside sa mga control measures na makaya ra sa atong opisino ,” sigon ni Doydora.
Ang lungsod sa pagkakaron nagdumala sa depopulasyon sa 127 ka mga baboy nga nagpositibo sa ASF sa tulo ka mga barangay.
Matod ni Doydora nga ang state of calamity magtugot sa mga lokal nga kagamhanan sa paggamit sa tukmang pundo, lakip na ang ilang Quick Response Fund, aron matubag ang krisis.
“Ang mahitabo ana makakuha og funding ug tabang pinansyal. Usa pod na aron ma control ang prices kay usahay magpahimos man gud ning mga mo baligya ug mo palit,” dugang niini.
Dugang pa ni Doydora nga ang komunidad adunay importante usab nga papel sa kampanya batok sa ASF. Namatikdan niya nga ang sayo nga pagtaho sa mga kaso mahinungdanon sa pagpugong sa pagkaylap sa ASF, nga nag-awhag sa mga tag-iya sa baboy sa pagpahibalo sa mga awtoridad kung ang mga baboy magpakita bisan gamay nga sintomas lakip na ang pagkaluyahon.
“Ang atong nakita na pinaka importante na buhaton ang information drive kay ang mga taw ang dako’g role. Kay kung sila maksabot, mo tuo sila sa atong recommendations, mo pugong sila sa mga entries, unya dili nila ipagawas ang ilang mga affected na baboy instead of tago-taguan,” sigon niini. (RTB)
