MIINGON si Col. Eduardo Malig-on, hepe sa Bohol Mineral Resources Regulatory Office (BMINRRO) Task force, nga hangtud karon anaa gihapon ang mga violators sama sa mag deliver og materyales nga walay mga delivery receipts nga maoy sagad madakpan.
Tungod niini mas hingusgan pa sa opisina ang ilang kampanya batok sa mga violators diha sa sand and gravel og quarry operators dinhi sa lalawigan sa Bohol taliwa sa dakong kalampusan sa nakalabay nga tuig particular ang nakab-ot nga dakong koleksyon
Gawas niini lakip usab sa mga violations kadtong extraction nga walay permit ug kadtong extraction beyond permitted area.
Tungod niini gi-awhag ni Malig-on ang mga barangay opisyal nga motabang usab sa pagmonitor sa mga nagpahigayon og quarry operation nga walay mga permit. Gipasabot ni Malig-on nga kon illegal walay mosulod nga income sa barangay.
Matud ni Malig-on nga ang Barangay maoy dunay dakong madawat nga bahin sa koleksyon sa Sand and Gravel og quarry operation nga mokabat og 40%, samtang 30% sa LGU ug 30% sa kapitolyo.
Dili pa lang dugay si Gobernador Aris Aumentado mipahibaw nga padayong misaka ang koleksyon sa buhis sa Sand and Gravel.
Sa buwan sa Enero hangtod sa Disyembre 16 tuig 2024, mikabat og P48,847,851.40 ang koleksyon sa Panudlanang Probinsyal mas dako kini kumpara sa koleksyon sa miaging mga tuig.
Dugang pa sa Gobernador nga sukad sa iyang paglingkod, ang kinatibuk-ang koleksyon mikabat og P101,882,599.80 diin 1000% ang tubo kumpara sa nanglabay nga panahon.
Subay usab sa strategic change agenda sa administrasyong Aumentado kahinumduman nga gilantaw niini ang maayong dagan sa ekonomiya pinaagi sa pagsiguro nga walay makalusot nga mga illegal quarry operations sa lalawigan sa Bohol. (RTB)
