GIKLARO ni Gobernador Erico Aristotle Aumentado atol sa ika-7 nga edisyon sa Aris sa Katawhan: Takna sa Gobernador didto sa Noah’s Ark, Dauis niadtong Nobyembre 2, nga bug-at ang kalambigitan sa Provincial Cooperative Development Office (PCDO) sa pagmintinar sa Bohol nga insurgency-free
Kini tungod kay ang maong opisina nagtutok sa pagpadangat og panginabuhian sa mga kwalipikadong mga kooperatiba o asosasyon.
“Usa pod na sa akong gipangita nga ‘way’ na ang pag-reduce sa insurgency, mahimo tang ma-maintain nga insurgency-free ang Bohol, is to reduce sa poverty incidence,” matud sa gobernador.
Tumong sa PCDO ang pag-organisar sa mga interesadong indibidwal ngadto sa usa ka kapunungan. Lig-onon kini pinaagi sa pagbansay kanila bahin sa bookkeeping, financial literacy, ug uban pang pagtulun-an isip pagpangandam aron marehistro ingun nga kooperatiba. Hatagan sila sa ayudang pinansyal aron maka-establisar og kapanginabuhian isip kabahin sa mga programa sa anti-poverty reduction.
Sa mga pagbisita ni Gob. Aumentado ngadto sa kabarangayan, nasuta niini nga kasagaran sa nag-ilaid sa kapobrehon mao kadtong mga dapit nga wala matagad sa gobyerno ug kasagaran kanila anaa mahimutang sa hilit nga bahin sa komunidad nga sa ingun dali nga madani sa mga ideolohiya sukwahi sa gipatuman sa Pangagamhanan.
Marching order ni Aumentado ngadto sa PCDO, uban sa pagdumala ni Ma. Conrada Fuentes, nga tutukan ang pagbubo sa mga ayuda ug teknikal nga tabang ngadto sa nag-unang 24 ka mga lungsod nga daghan ang mga pobre (poverty incidence).
Ang focal person sa PTF-ELCAC mihulagway sa mga dapit nga angayan tabangan nga kasagaran Geographically Isolated Disadvantaged Areas (GIDA).
Matud ni Executive Assistant Gil Bongato nga sa pagkakaron, adunay 95 ka mga benepisyaryo nga grupo ang natabangan sa PCDO, diin sumatotal 5,000 kapin ka mga membro ang nakadawat sa serbisyo sa administrasyon ni Aumentado pagpagaan sa ilang nagkalisod nga panginabuhi.
Mikabat sab sa 1,500 ang mitambong kanila sa culmination sa Cooperative Month sa nakalabay nga buwan sa Oktubre.
Sa laing bahin, ang Totolan Talisay Fisherfolks Association (TTFA) sa Totolan, Dauis, diin adunay 107 ka membro, nakadawat og P997,880 nga ayudang pinansyal gikan sa opisina sa Gobernador alang sa fish cage project.
Mikabat sa 10,000 ka fingerlings sa Bangus ang ilang unang gipahimutang sa fish cage ug mikita ang kapunungan og P397,000. Ang P78,000 niini ilang gideposito isip ilang tigom (savings).
Dakong pasalamat ni Maria Rosana Narciso, presidente sa TTFA, sa suporta gikan sa administrasyon ni Aumentado.
“Gobernador Aris Aumentado, daghan daghang kaayong salamat sa imohang tabang kanamo. Nakita namo nga ang imohang giduso kanamo nga project mi-grow jud siya, ug haom sa among panginabuian,” matud niini.
Matud ni Teruel nga dako og gikatabang ang mga kooperatiba sa Insurgency-Free status sa Bohol gumikan sa Poverty Reduction Program. Sa paglingkod ni Aumentado isip gobernador, gipakita niini nga seryoso ang iyang administrasyon sa pagpabalik sa mga rebelde ngadto sa sabakan sa gobyerno.
Rebranding niini sa serbisyo publiko, dili lamang nga, government bringing the services closer to the people, kundili, “we bring the government to the people.”
Si Teruel nagkanayon nga 500 na ka pamilya ang mga kanhi rebelde apan karon Kauban na sa Reporma (KR) ug mikabat sa 14 ka cluster kini sa tibuok probinsya. Gawas sa kapanginabuhian, gitagaan usab og scholarship ang ilang mga anak aron makabaton sa kalidad nga edukasyon.
Niadtong engkwentro sa Bilar sa nakalabay nga tuig, gibisita ni Aumentado, alas 8 sa gabii, ang haya sa rebeldeng nakabsan sa kinabuhi nga gipahimutang sa Sitio Banat-i San Jose, Mabini. Ang pagduyog sa kasub-anan, usa ka pagpakita nga seryoso ang gobernador sa kampanya batok insurhensiya.
Usa ka buwan sukad niadto, 66 ka rebelde ang mi-surender tungod kay taas ang ilang trust and confidence ngadto sa gobernador bisan pa man kung prisuhon sila sa ilang pagsurender.
Balanse ang pagdumala sa gobernador sa pagpadagan tali sa livelihood ug environment bisan pa man kung gipatuman niini ang iron fist kun kamay na bakal sama sa pagpaundang sa mga aktibidades sa whale shark ug pagpasira sa Virgin Island gumikan sa bandalismo sa mga koral.
Si Aumentado, isip chairman sa Local Amnesty Board (LAB), mapasalamaton sa pag-establisar ug operasyon sa LAB dinhe sa Bohol. Ang LAB-Bohol mao ang ika-20 sa tibuok nasod.
Sa partnership uban sa PNP, AFP, Philippine Army, DOJ uban ang IBP, ug sa pagduso sa Provincial Peace and Order Council, ang LAB kasamtangan nga nakadawat og 128 ka aplikasyon sa amnestiya ug giproseso kini sa National Amnesty Commission.
Sa mga nagtago gumikan sa mga kaso apan buot nga makapahimulos sa amnestiya, adunay safe conduct pass nga giapod-apod si NAC Chair Atty. Leah Armamento niadtong Oktubre 21 nga magamit samtang nagproseso sila sa rekisito sa amnestiya.
Giangkon ni Aumentado nga dili perpekto ang iyang administrasyon, apan anaa ang paningkamot nga ikapadangat ang balanse ug kalidad nga serbisyo ngadto sa katawhang Bol-anon, subay sa Strategic Governance Roadmap 2028. (RTB)
