TAGBILARAN CITY, Bohol (PIA) –Hangtud sa katapusang semana sa Febrero, aduna pa gihapo’y mga gibanabana nga 36 porsyento sa mga basakan nga mao pa lang gyud pagbuswak, ug possible nga madaut kon dili uwanon.
Kini maoy gipadayag sa National Irrigation Administration pinaagi ni Engr. Maria Donesa A. Autida, NIA Region 7 Acting Operations Section Chief, didto sa tigum sa Provincial Task Force El Nino sa Ceremonial Hall sa Capitol sa miaging semana.
Sa mga kabasakan nga gialagaran sa national irrigation system, mokabat pa sa 536.18 ka ektarya nga naulahi og pananum ang anaa pa sa iyang vegetative stage o gikan sa pagtagud, anaa pa ubos sa 55 ka adlaw.
Sa laing bahin, kadtong mga humay nga nadungan og sayu nga pagpananum, namatikdan nga anaa na sa iyang reproductive stage, segun sa taho.
Ang anaa sa reproductive stage mokabat ngadto sa 3,817.48 ka ektarya nga mahimo gihapon nga maapektohan kon walay mobundak nga ulan sulod sa Marso 2024.
Sa natad usab sa mga Communal Irrigation Systems, matud sa NIA nga anaa sa 50 ektaryas nga mahimong madaut kay anaa pa sa vegetative stage.
Kadtong mga nakauna og pananum gikan sa mga CIS, kinatibuk-an nga 1,967 ka ektaryas ang anaa na sa pagbanay hangtud nga masudlan na ang tipasi.
Gibutyag sa Department of Agriculture Provincial Agriculture Technology Coordinating Office, pinaagi ni Cecile Opada nga kon sa panahon nga ang humay magsugod na og banay kay anaa na sa sobra s 3 ka buwan.
Apan walay sakto nga suplay sa tubig, delikado nga mas daghan pa ang tipasi nga walay unod mao nga pakyas ang cropping season.
Bisan sa nagpanghitabo, nag-andam na unta ang Provincial Disaster and Risk Reduction Management Office og pundo nga ilang ikaabag sa mga mag-uuma nga Bol-anon, wala kini madayon sa 2023, sanglit may mga direktiba kabahin niini nga sundon aron mapagawas ang pundo.
Niini usab, samtang wala pay pundo nga magamit usab sa atong kagamhanan pinaagi sa Capitolyo, gibutyag ni Opada nga sa 2024, adunay gitagana ang DA Bureau of Soils and Water Management nga P5 M alang niini nga katuyuan.
Ang Bohol karon kasamtangan nga naghupot sa kapin sa upat na ka tonelada ug sa kinatibuk-an nga 586.18 ka ektarya nga anaa pa sa vegetative stage ang humay, apan kon walay uwan, mahimong dili na saligan ang nahisgutang pundo. (rahc/PIA_7/Bohol)
