GILAOMAN nga mas magmaya ang Pasko karong tuig 2025 kay andam nang tugutan ang pagsulod sa baboy ug mga produktong baboy gikan sa gawas sa probinsya sugod karong Disyembre, human hingpit nga giaprobahan alang sa third ug final reading sa Sangguniang Panlalawigan (SP) ang Proposed Provincial Ordinance No. 50-2025 o ang “Bohol African Swine Fever Policy Strengthening Ordinance of 2025.”
Giduso kini ni Board Member Lucille Lagunay, nga mao ang chairman sa Committee on Finance, Budget and Appropriations para sa third ug final reading atol sa regular session gipangulohan ni Board Member Jiselle Rae Aumentado Villamor, ang temporary presiding officer karong bag-o.
Kini naghulip sa daang total ban ngadto sa reguladong pagpasulod sa buhi nga baboy, pork, pork products, ug swine genetic materials dinhe sa lalawigan sa Bohol.
Sa Provincial Ordinance gi-regulate mao ang pagpasulod sa buhi nga baboy, pork ug pork products, frozen swine semen, ug processed porcine protein, pagpasulod sa livestock ug poultry transport carriers nga walay espesyal nga awtorisasyon, pagbalhin sa mga produkto gikan sa ASF-infected o quarantine zones padulong sa Bohol.
Gipahugtan ang dokumentary requirements, nga kinahanglan tinuod, kompleto, ug awtentiko. Ang peke, kulang, o dili tukmang papeles mahimong hinungdan sa silot.
Ang general penalty mao ang P5,000 matag paglapas ug ang pagkumpiska sa kargamento. Ang transport companies mahimong maapil sa kaso, samtang ang responsable nga personnel multahan usab og P5,000, gawas pa sa posibilidad nga prisohon hangtod unom ka bulan.
Ang ordinansa pirmahan ni Governor Aris Aumentado ug mahimong epektibo 15 ka adlaw human mapublikar, samtang ang Implementing Rules and Regulations (IRR) pagamugnaon base sa rekomendasyon sa ASF Task Force.
Matod ni BM Lagunay nga ang maong lakang dili pagluag, kondili usa ka tukmang regulasyon nga nag-abli pag-usab sa pagpasulod sa produkto, apan uban sa hugot nga pagbantay, hapsay nga proseso, klaro nga guidelines, ug lig-on nga biosecurity.
Tungod niini, gilaoman ni Lagunay nga makatabang kini sa pagpahiuli sa supply, pagpastabilize sa presyo, ug pagbangon pag-usab sa industriya sa baboy nga dili maghulat og peligro sa ASF. (RTB)
