GIILA sa ikaduhang labing-labaw nga opisyal sa Bohol ang dakong kontribusyon sa kababayen-an sa katilingban, dungan sa paghandum sa International Women’s Day kaniadtong Biyernes, Marso 8, 2024.
Sumala pa ni bise-gobernador Dr. Dionisio Victor A. Balite, Ph.D nga kinahanglan matapos na ang gender-based nga kapintasan, diskriminasyon ug pagpihig batok sa mga babaye.
Gipasabot ni BG Balite nga nagpabilin gihapon ang diskriminasyon ug dili patas nga tratamento sa mga kababayen-an.
Giawhag sa bise-gobernador ang publiko nga magtinabangay sa pagpasiugda sa usa ka inklusibo nga katilingban.
Gipunting ni BG Balite nga pinaagi sa pagpalig-on sa tingog sa kababayen-an, pagdepensa sa ilang katungod ug pagpasiugda sa ilang kagawasan, ang tibuok komunidad ug tibuok nasud mahimong mabayaw ngadto sa mas lig-on ug progresibong kalibutan.
Gipasabot sa bise-gobernador nga sa usa ka edad nga gimarkahan sa paspas nga pagtubo ug pagbag-o, gikinahanglan alang sa global nga komunidad nga pasidunggan ang dili maihap nga kantidad sa mga kontribusyon sa kababayen-an sa tanan nga bahin sa katilingban ug ipadayon ang mga kadaugan nga mitumaw gikan sa ilang dili maihap nga mga pakigbisog ug sakripisyo.
“Bisan pa, sulod sa atong walay hunong nga pagtinguha sa pag-uswag, kinahanglan natong atubangon ang mga dili managsama ug kalainan nga nagpadayon gihapon,” sigon ni Balite.
Pinaagi sa pagtapos sa kapintasan nga gibase sa gender, diskriminasyon, ug mga pagpihig nga nagpalandong sa katumanan sa mga damgo sa kababayen-an, aktibo kami nga nakigbahin sa usa ka misyon nga nag-amuma sa kaangayan, paglakip, ug paghatag gahum, dugang pagpasabot sa opisyal.
MAGSAYSAY
Muhatag og pagyukbo si bise-gobernador Dr. Dionisio Victor A. Balite, Ph.D sa ika-67th anniversary sa kamatayon ni kanhi Presidente Ramon Magsaysay sa umaabot nga Marso 17, 2024.
Sumala pa ni BG Balite nga angay panaminan sa mga politiko ang maayong liderato ni Magsaysay nga nailhan tungod sa limpyo nga pang-gobiyerno ug walay bahid sa kurapsyon.
Matud ni Balite nga isip nangalagad sa katawhan kinahanglang magbilin sa mga maayong legasiya ngadto sa katawhan.
Gipasabot sa bise-gobernador nga makiangayon nga hatagan og mga programa ang mga tawo sanglit mao kini ang obligasyon sa mga opisyal.
Dugang ni Balite nga usa si Magsaysay sa mga ehemplo alang sa mga tawo kay tinud-anay ug kinasing-kasing kini nga nangalagad sama kaniya..
Base sa kasaysayan, si Magsaysay nibayahe paingon sa Manila gikan sa Cebu niadtong Marso 17, 1957 ug ang eroplano nga iyang gisakyan nahagsa sa Mt. Manunggal sa Lungsod sa Balamban sakop sa lalawigan sa Sugbu. (RTB)
