KAPIN ₱3.2-milyon na ang napasulod sa lokal nga ekonomiya sa dakbayan sa Tagbilaran pinaagi sa crisis response programs nga “Libreng Sakay” ug “Kompra sa Tagbi Food Voucher,” sumala ni Mayor Jane Yap.
Sa midweek report nga gipagawas karong Mayo 6, giingon ni Yap nga padayon nga nakahatag og direktang tabang ang city government ngadto sa mga commuter, driver, vendor, ug suppliers atol sa kasamtangang krisis.
Base sa datos sa city government, naka-serbisyo na ang “Libreng Sakay” sa 67,125 ka pasahero ug nakakompleto og 3,937 ka biyahe, samtang ₱1.2-milyon nga subsidy ang direktang nahatag ngadto sa mga commuter ug public utility drivers.
Samtang, 22,569 ka food vouchers na ang nagamit sa mga merkado ubos sa “Kompra sa Tagbi Food Voucher” program, ug 10,064 niini ang na-encash na sa accredited vendors, nga miresulta sa kapin ₱2-milyon nga cash circulation sa lokal nga ekonomiya.
Gipasabot ni Yap nga dili lamang ayuda ang programa kondili usa usab ka economic intervention aron mapadayon ang panginabuhian ug kalihokan sa merkado.
Matod pa sa mayor, gipaningkamotan sa city government nga masiguro nga adunay masakyan ang katawhan, adunay pagkaon sa lamesa, padayon nga makapanginabuhi ang mga driver, ug motuyok gihapon ang kwarta alang sa mga vendors ug lokal nga mag-uuma nga suppliers sa merkado.
Matod ni Mayor Jane Yap nga dili lang kini ayuda kondili economic activity nga ginapadagan aron walay mabiyaan.
Padayon usab nga gipalihok sa city government ang maong mga programa ubos sa kampanya nga “Serbisyong Buhat Kontra Saad. (RTB)
