TAGBILARAN CITY — Gipakusog sa Provincial Government of Bohol ang koordinasyon sa mga ahensya sa pangisda ug lokal nga kagamhanan aron mapanalipdan ang panginabuhian sa mga mangingisda ug maseguro ang suplay sa pagkaon taliwala sa epekto sa El Niño ug sa 17.7 porsyento nga pagkunhod sa fisheries production sa Central Visayas.
Base sa datos nga gipresentar sa Philippine Statistics Authority, miubos ang fisheries production sa rehiyon gikan sa 19,710 metric tons sa ikaduhang quarter sa 2025 ngadto sa 16,225 metric tons sa samang panahon sa 2026.
Gilambigit ang pagkunhod sa ubos nga kadaghanon sa pipila ka species sa municipal fishing grounds ug sa selective harvesting sa aquaculture ponds diin ang stocks wala pa makaabot sa marketable size.
Tungod niini, gipundok sa Office of the Provincial Agriculturist, kauban ang Bureau of Fisheries and Aquatic Resources, ang municipal ug provincial fisheries technicians, BFAR Region VII representatives ug PSA atol sa Stakeholders Meeting and Assessment Workshop niadtong Oktubre 23 sa Water Paradise Resort sa Tagbilaran City.
Gipasiugda ni Gov. Aris Aumentado ang kamahinungdanon sa panaghiusa sa mga ahensya ug LGUs aron mapalig-on ang panginabuhian sa mga mangingisda, maprotektahan ang fisheries resources ug masiguro ang padayon nga suplay sa pagkaon.
“Importante ang panaghiusa ug koordinasyon sa mga ahensya ug lokal nga panggamhanan aron mapalig-on ang panginabuhian sa atong mga mangingisda, mapanalipdan ang atong mga kahinguhaan, ug masiguro ang padayon nga suplay sa pagkaon sa matag pamilyang Bol-anon,” matud ni Aumentado.
EL NIÑO RESPONSE GIPALIG-ON
Sa mensahe sa gobernador nga gihatod ni Executive Assistant for Agriculture Engr. Ricardo Oblena, giawhag ang fisheries technicians sa paghimo og proactive measures batok sa El Niño.
Lakip niini ang pagdasig sa mga komunidad sa pagtanom og short-duration crops sama sa kamote ug kamoteng-kahoy aron makatabang sa food security panahon sa climate disruptions.
Gipasiugda usab ni OPA Head Liza Quirog ang mga inisyatiba sa probinsya alang sa agri-fisheries ug coastal livelihoods.
Lakip niini ang proposed BluePort project, padayong milkfish fry seeding, pag-apod-apod og Payao, plano nga mga hatchery, ug mas lig-on nga representasyon sa Fisheries and Aquatic Resources Management Councils.
Gihisgutan usab ni Quirog ang cloud-seeding operations sa probinsya isip kabahin sa tubag sa El Niño ug gipasiugda ang padayong koordinasyon sa BFAR ug municipal governments alang sa coastal ug inland communities.
MGA LGU GIPASUMITE OG DAMAGE REPORTS
Si Bohol Provincial Fishery Officer-in-Charge Gaymelo Lopez mipresentar sa updates sa 2026 Fisheries Development Extension Program ug miawhag sa fisheries technicians sa pagsumite og municipal damage reports alang sa monitoring.
Iyang girekomenda usab ang pagkunhod sa fish stocking density kon kalit nga moubos ang water level ug pagbutang og temporary shields aron mapanalipdan ang stocks gikan sa direktang kainit.
Sa laing bahin, gipasiugda ni BFAR Planning Officer Liza Casquejo ang panginahanglan sa tukma ug consistent nga administrative records, ilabi na sa fisherfolk listings.
Gihisgutan usab ang insurance coverage alang sa designated FARMC officers, members ug Bantay Dagat personnel, samtang gipahibalo ang FARMC Summit nga pagahimoon sa Nobyembre 4.
Gipresentar usab sa workshop ang sectoral updates sa El Niño response sa OPA alang sa marine, inland ug capture fisheries sectors.
Ang mga lakang kabahin sa Strategic Governance Roadmap sa probinsya nga naghatag og prayoridad sa climate resilience, sustainable agriculture ug fisheries, environmental protection ug food security.
Isip unang ug bugtong UNESCO Global Geopark sa Pilipinas, padayon nga gipunting sa Bohol ang pagpanalipod sa natural resources samtang gisiguro nga mapadayon ang panginabuhian sa mga komunidad nga nagsalig niini.
