MAO kuno kini ang kinauyukang mensahe sa pagtuong Kristiyano, matud ni Martinus Thomsen nga giilang usa ka modernong propeta didto sa Denmark. Hinuon, siya nagdumili nga ilhong usa ka propeta. Si Martinus nangutana: Unsa ang moral nga basihanan sa pagtuong Kristiyano?
Ang moral nga basihanan sa relihiyong Kristiyano mao gayud ang unibersal nga moralidad. Kining maong unibersal nga moralidad atong nailhan pinaagi sa mga pagtulun-an, kinabuhi ug mga gawi sa atong Ginoong Hesu Kristo. Kini nga pagtulun-an gilatid niining Iyang mga panultihon: “Higugmaa ang Ginoong Dios sa tibuok mong kasingkasing, tibuok mong kalag ug tibuok mong hunahuna – Higugmaa ang imong silingan sama sa imong kaugalingon – Higugmaa ang imong mga kaaway, panalangini sila nga nagtunglo kanimo, pagbinuotan ngadto sa mga nagdumot kanimo ug iampo sila nga nagpasipala ug naglutos kanimo: nga mahimo kamong mga anak sa Amahan nga atua sa langit, kay Iyang gipasidlak ang Iyang Adlaw sa maayo ug dautan, ug gipabunok ang ulan ngadto sa mga makiangayon ug dili makiangayon. – Kay kon ang imo rang higugmaon kadtong nahigugma kanimo, unsay imong makab-ot nga ganti? Dili ba hasta ang kasagarang tawo nagbuhat niini? Og kon ang imong tagdon kadto rang imong kaila, unsay imong kalahian sa uban? Dili ba ang kasagarang tawo nagbuhat niini? – Busa, kab-uta ang kahingpitan, kay ang imong Amahan nga anaa sa langit hingpit man”.
Dugang pa niini: “Isud sa sakuban ang imong hinagiban kay si bisan kinsang mogamit sa hinagiban mahanaw pinaagi sa hinagiban. – Kay mao kini ang kahulogan sa balaod ug mga propeta: Buhata sa uban ang gusto nimong ilang buhaton kanimo”. Dili ba kini nga mga panultihon tataw nga nagpakita sa usa ka moralidad nga maoy hingpit nga agianan paingon sa tinuod nga kalinaw ug pagwagtang sa gubat, tali sa matag nasud ug indibiduwal? Aduna pa bay mas hingpit niini? Si bisan kinsa, uban sa tim-os nga kasingkasing, nga mosunod niini mahigugma gayud sa iyang kaaway ug manalangin kanila nga nagtunglo kaniya. Unsaon pa pagtunhay sa gubat sa maong mga kahigayonan?
Ang tawong mobuhat sa ingon dili gayud malain, dili masuko, dili mangabugho o masina, ug dayag na lang nga dili usab siya maaghat sa pagpanglutos o pagpasipala sa iyang isig-ka-ingon. Ang iya rang gusto mao ang pagbuhat og maayo sa uban. Kung magbaton kita sa maong gawi, mahilayo kita sa pagdumot, kasuko ug kasamok. Dili ba mao kini ang gipadayag didto sa Krus sa Golgotha? Dili ba tataw nga ang Manunubos sa Kalibutan wala moisip bisan sa mga mipatay Kaniya nga mga kaaway? Nakasabut Siya nga wala sila masayud sa ilang gibuhat. Maoy hinungdan nga Iyang gipasaylo ang ilang pagpanamastamas Kaniya ug gihangyo pa Niya ang Amahan nga dili sila silutan.
Dili ba ang atong gikahibalag dinhi usa ka hingpit nga balaan ug hingpit nga kinaiya? Dili ba kini nga kinaiya adunay kahiusahan ug Iya sa Dios? Dili ba ang pagpalansang Niya sa Krus usa ka pagpadayag sa usa ka matang sa kinaiya nga dili hitupngan? Duna pa bay makatupong sa paghigugma sa kaaway sama sa mga higala ug sa kaugalingon? Dili ba buot ipasabut niini nga kon makab-ot mo na ang pagkabalaan, dili ka na masuko batok ni bisan kinsa ug bisag unsa?
Ang pagbaton sa maong kinaiya sama ra nga ang imong kahayag midan-ag sa tanan sama sa paggakus sa Dios kanatong tanan sa Iyang balaang gugma. Mao kini ang Balaang Balaod sa Kinabuhi, Malungtarong Kalinaw ug Kinabuhing Way Katapusan. Kini tipik lamang sa mga mensaheng gipaambit ni Martinus Thomsen.
