TUNGOD sa dugay nang pandemya daghan nang nakat-on pagpananum. Garbo nilang gitawag ang ilang kaugalingon nga mga Plantito ug Plantita; husto pud.
Unya miabut ang makalilisang nga paghaguros ni Odette. Ang mga tanum maoy unang nangalarag. Mga dahon, sanga, buwak, ug mga bunga ug lakip na ang mga dalid nangalukat. Apan sa wa madugay, migitib na usab ang mga dahon.
Ang ideya ning maong lindog kinutlo gikan sa sinuwat ni Michael Ronall, American author ug teacher, sa iyang artikulo nga nag-ulohan “How Then Shall We Live” nga gipublikar niadtong 2013.
Si Ronall miingon “Sa tanang mga ginharian sa kinaiyahan, ang labing putli nga manipestasyon sa kinabuhi makita diha sa tanum”. Mao ba?
Ang mga tanum walay mga uwag nga posibleng makamansa kanila sama sa nahitabo sa mga hayup ug tawo. Wala silay pagbati. Nagpasabut ba kini nga angay natong pugngan ang atong mga pagbati aron mabuotan ta? Di man tingale ni maoy gipasabut ni Ronall.
Ang iyang punto mahitungod sa sakripisyo.
“Vegetation shows spiritual progress at its purest, free of the conflicting and life-compromising passions that bring decay and death in their wake. The plant shows that sacrifice, rather than competition for survival, is the principle of true development, as the words of our Lord Jesus Christ reveal: Unless a kernel of wheat falls to the ground and dies, it remains only a single seed. But if it dies, it produces many seeds”, si Ronall midugang.
Unsaon man nato pagsundog ang sakripisyo sa mga tanum? Unsang mga parte o aspeto sa atong kinabuhi ang kinahanglan natong i-sakripisyo? Ang mga kasaypanan, mga bisyo ug addictions morag maoy sayun natong mapunting. Pero dili kini ingon-ana kasayon.
Ang mga kasaypanan mahimong hatagag mga rason, ilabi na kon kini naglambigit sa nagkalain-laing tawo. Ang mga bisyo usab posibleng nahimo nang mga habits nga lisud nang sumpoon. Mas lisud pa gyud undangon ang addictions, ilabi na kon kini psychological ug wala nato mahimatngoni.
Ang drugs ug alcohol maoy labing komon sa mga addiction nga atong nailhan. Apan duna say addiction sa sex, relihiyon, politika, kwarta ug relasyon; og gani wala kini nato ilha nga mga addiction. Duna gani’y mga tawo nga nagtuo nga kining mga butanga lakip sa kalampusan sa kinabuhi, apan sa pagkatinuod kini diay mga demonyo nga mitakboy na kanato.
Ang mga bulak ug prutas mao gayud ang korona ug himaya sa mga tanum. Inig-ka-larag sa mga buwak ug mangatagak ang mga bunga, timailhan kini nga ang tanum mihalad na sa iyang kaugalingon aron adunay mga bag-ong tanum nga motubo gikan sa iyang mga binhi.
Kita, unsay atong ihalad aron adunay bag-ong pagkatawo nga motunhay dinhi kanato? Unsa kahay atong gipaambit aron molambo ug molipang ang kinabuhi sa uban?
Ang Ecclesiastes naghisgut nga adunay “time to be born and a time to die, a time to plant and a time to uproot.” Apan kanus-a kita angayang moasdang o moatras sa kinabuhi? Kanus-a makig-away o molikay? Kanus-a mobarug ug mosibug?
Sama sa binhi nga mosuway pagturok bisan diin siya matagak, kita usab modawat kon asa kita dad-on sa Kahitas-an. Isalig ang kinabuhi ngadto sa Labawng Makagagahum. Gawasnong pagpili sa pagsalig ngadto Kaniya. “Ang Imong Pagbuot maoy matuman, Ginoo”. Kini ang atong labing maayong pag-ampo.
