PAGPAHIGAYON sa Sandugo Agri-Fair karong tuiga talagsaon kay sa naandan nga selebrasyon tungod kay ipasiugda kini sa Experiential Learning nga mapuslan sa mga tinun-an o sa mga batan-on nga henerasyon diin ang maong mga kalihokan napasagdan sa modernong panahon.
Si Provincial Agriculturist Liza M. Quirog nagkanayon nga ang agri-fair nga gikatakda karong Hulyo 17-19, 2023 sa Old Tagbilaran City Airport mahimong halandumon ug mas makalingaw tungod kay ang tanan adunay kahigayonan nga makat-on sa daan nga best practices sa mga sektor sa agri-fishery nga morag hinay-hinay nang nawagtang sa bag-ong henerasyon sama sa: rice pounding, traditional stone corn grinding, coconut grating, Karomata Riding, Bangus Deboning, Net Mending, ug Puso Making.
Ang experiential learning himuon sa ikaduhang adlaw sa alas 8:30 sa buntag hangtud sa alas 5:00 p.m. sa venue.
Si Quirog nagkanayon nga ang 3-day fair nga nagdala sa tema nga “Kayutaan ug Kadagatan Palambuon Subay sa Hagit sa Panahon” sugdan sa usa ka motorcade contest sa ala 1:00 sa hapon sa unang adlaw sa jump-off area sa Capitol Grounds nga moagi sa New Capitol Site Road – Hangos St. – J.A. Clarin St. – City Hall Grounds – Calceta St. -CPG Avenue – City Airport Road hangtod sa venue.
Sa pagbukas nga programa, si Gobernador Erico Aristotle C. Aumentado mohatag sa iyang ikaduhang inspirational nga mensahe sukad siya nilingkod isip gobernador sa Sandugo Agri-Fair samtang ang tulo ka solons sa probinsiya mohatag sa ilang mga mensahe sa suporta: First District Congressman Edgar M. Chatto, Ikaduhang Dist. Congresswoman Vanessa Aumentado, ug Third Dist. Congresswoman Alexie B. Tutor; samtang si Bise Gobernador Dionisio Victor Balite, SP Committee on Agriculture maoy mohimo sa opening statement human si Quirog mupaila sa mga bisita ug mga partisipante diin si City Mayor Jane Censoria C. Yap sa Tagbilaran City maoy mohatag sa welcome message.
Si Gobernador Aumentado human sa opening program mangulo sa ribbon cutting ug pag-abli sa mga exhibit para sa Agri–Fair 2023 kauban ang bise-gobernador, tulo ka solon, ang mayor sa siyudad ug tanang mga mayor sa munisipyo.
Sa unang adlaw usab nga ipahigayon ang judging sa product display contest ug ang Agri- Stakeholder’s night sa Bohol Cultural Center.
Adunay Quiz Bee nga ipahigayon sa Agricultural Training Institute (ATI) 7 sa katapusang adlaw sa alas 9:00 sa buntag, samtang ang closing ug awarding program himuon sa alas 3:00 sa hapon didto gihapon sa Old City Airport diin si Gobernador Aumentado mohatod sa iyang inspirational message ug manguna sa paghatag ug pasidungog ug pag-ila sa mga mananaog sa lain-laing mga sangka ug ang partisipasyon sa Municipal Local Government Units (MLGUs).
Ang Sandugo Agri-Fair 2023 maoy tinuig nga aktibidad sa Kagamhanang Probinsyal sa Bohol pinaagi sa Office of the Prov’l. Agriculturist (OPA) isip usa sa mga aktibidad nga mopasiugda sa tibuok buwan nga selebrasyon sa Sandugo Festival.
Subay niini, si Provincial Administrator Asteria Caberte nihangyo sa media nga ipakatap ang mga kalihukan sa Sandugo Festival. (RTB)
