DIHA’Y mga politikong nagdiskusyon kabahin sa mga posibleng kandidato pagka-presidente sa 2028. Gihisgutan nila ang mga ngalan ni Sarah Duterte, Imee Marcos, Cynthia Villar, ug uban pa. Apan usa kanila, gilaayang naminaw, mitiaw-tiaw pag-ingon, “Ah basta ako, mangita na lang kog bag-ong relihiyon og adto ko pasakop”.
Kini nagtukmod kanato pagtuki sa hisgutanang relihiyon. Kung atong tugkaron, usa ka panglantaw mao nga, ang relihiyon dili mahitungod sa pagka-Catolico, Protestante, Born-again, Buddhist, Taoist ug uban pa. Kini mga ngalan lamang sa denominasyon. Ang batakang kahulugan segun sa mga labing karaang diksyonaryo nag-ingon, “Ang imong relihiyon mao ang imong kinabuhi”.
Mosunod dayon niana ang pangutana, kung ang imong kinabuhi maoy imong relihiyon, kinsa man ang imong Dios? Usa ka tubag niana naga-ingon, ang imong dios mao kanang imong gihatagan sa labing taas nga bili sa imong kinabuhi; ang imong giila nga maoy labing mahinungdanon.
Busa, pangutan-on nato ang tagsa-tagsa ta ka kaugalingon, unsa may atong gihatagag labing taas o labing mahinungdanong gibug-aton sa atong kinabuhi? Daghan kanato ang dayag na lang nga moangkon nga kita Kristiyano, Catolico, Iglesia Ni Cristo, Born-again, ug uban pa. Apan daghan kanato o di ba kaha kasagaran, kwarta/salapi/bahandi gayud ang gihatagan sa labing taas nga gibug-aton.
Bisan unsa pay ilang isulti, kon atong subayon, ang tinuod nga gipaka-dios mao gayud ang kwarta/salapi/bahandi. Dili ta mohukom sa kinabuhi sa uban dinhi. Gihinuklugan lang nato ang unsay klaro na. Sa samang bahin, kung atong angkonon nga ang atong Ginoong Hesu Kristo maoy atong Dios, nan, giawhag kita pagpakita niini sa atong kinabuhi diin siyay hatagan sa labing taas nga gibug-aton. Dili ta maayong ehemplo dinhi; labaw pud tang nakigbisug pa, huyang pa. Kita mismo moangkon, nga lisud gyud ang ciento-por-cientong pagsunod sa mga baruganan sa atong Dios. Lisud pagpas-an sa Krus. Maningkamot lang.
Kung atong tan-awon ang atong mga lideres, global man o lokal, unsa kaha ang ilang gihatagan sa labing taas nga gibug-aton? Wa ta maghisgut ini sa mga political leaders lang; lakip na ang mga business leaders, civil society leaders, government leaders, ug bisan ang mga church leaders. Ang mga baruganan ba sa atong Ginoong Hesu Kristo maoy labing importante alang kanila? Dios Amahan ba? Yahweh? Buddha? Tao? Almighty God, ug uban pa? O, di ba kaha kwarta/salapi/bahandi? Gahum? Pagkasikat? Popularidad? Ikaw nay hukom. Kita, mismo, nakigbisug pa pud sa atong mga kasaypanan.
Ang atong panultihon karong semanaha gikan sa binag-ong version sa Karaang Testamento diin si Yahweh misulti pinaagi kang Propeta Amos, kinsa miingon diha sa (Amos 5: 21-24): “Di na ko kaantus sa inyong mga religious meetings. Giluod na kos inyong mga conferences ug conventions. Wa na koy labut sa inyong mga religious projects, mga tigpakaaron-ingnong mga slogan ug katuyuan; sa inyong mga fund-raising schemes, public relations ug image-making. Nabungog na ko sa inyong mga banha nga musika. Kanus-a man ang imong katapusang awit alang kanako? Nasayud ka ba kon unsay akong gusto? Gusto kog hustisya—kadagatan niini. Gusto kog kaangayan—suba-suba niini. Mao na’y akong gusto. Kana ra gyud”.
