ALANG SA UBAN, ang Eleksyon para ra kuno sa mga kuwartahan, ilado ug impluwensyado. Mutuo mo?
Ang ilang punto, kun wala kay kuwarta karong panahona, ayaw na lang patuga-tuga sa pagdagan, kay basin kuno mudagan kun kita pangayoan.
Pipila ka adlaw o semana human nahibaw-an sa uban sa akong mga kaliwatan nga ni-file ko sa akong COC para kagawad sa lungsod sa Trinidad, nanggawas ang mala ug halang nga mga istorya gikan sa ilang mga baba.
“Nagjama-jama ra man intawon ng bata-a (sa iyang pagdagan,” suma pa kuno sa akong iyaan sa pag-agawan.
“Pa-ampo-a na sa seminaryo aron malamdagan,” matud kuno sa akong uyoan sa pag-agawan.
Ug daghan pa’ng mga istorya nga medyo sakit hunahunaon. Pero wala ko nagpatarog. Padayon ko kay gusto kong mu-abante ang among katawhan ug lungsod.
Usa sa akong kaila nga pulitiko niingon nga anaay tulo ka klase sa botante: ato (solid, loyal, andam mu-depensa o mu-atake basta ana-a sa sakto), dili ato, ug ang mga paling-paling o question mark pa ang baruganan.
Ang loyal o solid (atong mga tawo), matud niya, dili kana mapalit sa kuwarta. Bisan pa og dili na kadawat og inangayan, mu-botar gayud kana nimo. Mu-laban pa.
Ang dili ato, mu-puti na lang imong buhok dili gayud na makuha nimo. Siguro, kun anaay milagrong mahitabo.
Ang mga question mark o paling-paling (ato-di), mao na sila ang mu-dawat pikas ug pikas. Walay baruganan.
Anaay gipuno ang maong pulitiko nga, “Kana ganing kusog mangayo og pabor o kuwarta, lisod ng mga tawhana saligan, ilabina kun mu-ihap kun pila sila kabuok (5 mi, 6 mi o 10 mi),” dugang niya.
Ang maong istorya akong nasinati gayud. Ug niingon pa nga daghan kuno kaayo sila sa ilang pamilya. Sobra 20 kabuok.
Sa akong pagsabot, anaay pangayuong pabor. Akua lang pud giyango-yanguan. Nangayo og pang-gasolina. Diha man ko’y “pila ka dako”, akong gitunol.
Akong nahinumduman ang gisulti sa usa ka pulitiko nga, anaay mga klase sa tawo nga maila sa ilang kinaiya ilabina kun nag-apas og kuwarta.
Pobre kining inyong alagad apan magpapili kay dako og pangandoy alang sa katawhan nga akong gustong alagaran.
Ana-a man gayuy mga tawo nga “lingin” ang giapas bugti sa ilang bulawanong boto, dili na lang nato ipugos ang atong kaugalingon kanila, kay basin sila pa ang makapahimong kurakot sa ubang magpapili kun mahatagan sa kahigayunan nga makaalagad sa katawhan.
Karong panahona, mas init ang impluwensya sa kuwarta, nga bisan maayo ang imong mga tumong ug tinguha, dili ka pilion basta walay “takwal” matud pa sa akong uyoan.
Naandan na man kuno nga gastuso ang Eleksyon, ako lang pud suwayan basin mahigmata ang uban sa atong kaigsoonan nga nagdamgo pa og dakong salapi nga makuha karong Mayo 9.
Matud pa sa akong kauban nga beterano sa pulitika, “Wala siguro nila hunahuna-a nga ang ilang madawat nga P1,000-P1,500 mahurot ra sa duha (2) ka adlaw apan ang ilang pag-antos sulod sa tulo (3) ka tuig o 1,093 days gikan sa ilang pagdawat sa maong salapi.”
Maila gayud sa kuwarta ang tawo ug daghang mailad niini ilabina kun duyogan sa mga bulawanong saad.
Ang pangutana, magpailad pa ba ka sa salapi kaysa tinud-anay ug patas nga serbisyo-publiko? Kamo na’y mag-igo, mga kaigsoonan.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
