ANG pagtagbo sa bag-ong tuig gipangandaman ug mga lihi, lami-an nga pagkaon ug nindot nga kalingawan. Halos tanan ang naghulat sa tuig 2023 sa wala pa kini moabot. Bisan nga sayong gisaulog ang misa sa mga simbahan, tin-aw ug tataw kaayo ang kahinam ug kahigwaos sa kadaghanan nga motagbo sa nagsingabot nga tuig. Sa mga talad-kan-anan, nagpangidhat ang litson ug ubang mga niluto ug potahe nga gihimong lihi sa buhong nga bag-ong tuig. Banha ug alingogngog ang mga sakyanan sa mga kadalanan, ilabi na ang gikan sa mga motorsiklo nga gituyu-an pagtangtang sa tambutso. Ang bag-ong tuig usa ka kasaulogan nga angay natong matugkad ug masabtan.
Bisan dili kaayo daghan ang mga pabuto, madungog gihapon ang mga pakapaka gikan sa silinganan ug sa mga gitugot nga dapit-pabuthan. Hinuon sa kinatibuk-an, medyo mingaw ang pagsaulog sa milabay nga pagtagbo sa bag-ong tuig. Daghan ang miingon nga lahi ra kon itandi sa mga nanglabay nga katuigan sa wala pa ang pandemiya. Mabantayan nga ang mga katawhan wala na kaayo mogasto. Mas gigusto nila nga tigumon na lamang ang ilang kwarta alang sa ubang kagastohan. Gani giangkon ug napamatud-an kini sa mga negosyante sa kamerkadohan. Matud pa, dili na kaayo daghan ang namalit ug mga prutas nga ligngin.
Apan unsa ang tuig? Ang tuig gilangkob sa 365 ka mga adlaw (common year). Usa kini ka sukdanan sa kadugayon nga ang kalibotan makalibot sa adlaw. Moabot kini ug 366 ka mga adlaw panahon sa leap year. Sibo usab kini sa napulog duha ka buwan nga adunay 28, 29 (leap year), 30 ug 31 ka mga adlaw matag buwan. Mahimo usab kining ihapon nga senimana, inoras, minutos ug segundos. Gitiman-an kini sa mga katawhan pinaagi sa kalendaryo nga gibitay sa mga panimalay ug buhatan. Ang uban gisulod sa mga hunos ug mga pitaka. Adunay mga nasud ug dapit sa kalibotan nga migamit ug lahi ug nagkada-iyang sukdanan sa kadugayon sa tuig.
Ang uniberso maoy kawanangan nga gilangkoban sa daghang solar systems, galaxies, mga bitoon ug planeta. Ang pagkahiluna sa kawanangan gipasabot pinaagi sa Law of Universal Gravitation ni Sir Isaac Newton. Ang kalibotan nga atong gipuy-an usa lamang sa mga planeta sa kawanangan. Kini naglibot sa usa sa mga adlaw sa atong Milky Way Galaxy samtang nagtuyok usab sa iyang tuyokanan. Samtang hipno ug hingpit pa ang uniberso, padayon usab ang kalihokan sa kawanangan. Sa panahon nga magkaguliyang ang pagkapahiluna niini, mahimong mahunong na usab ang pagtuyok sa kalibotan. Hayan mawala na ang bag-ong tuig.
