KARONG paskoha nahiagum intawn ang atong kaigsoonang mga Tagbilaranon diha haduol sa pantalan sa usa ka dakung trahedya, sunog. Atong iampo ang ilang luwas nga pagtabok ngadto sa bag-ong tuig uban sa panabang sa kagamhanan sa syudad, ug mga pribadong sector.
Sa gihapon, tungod kay kita makasasala man ug nanginahanglan sa pagtubos sa mianhing Manunubos, dili nato suklian ang mga dautang pulong ug mga tumo-tumo nga atong masinati. Ang kamatuoran lamang mao’y makapalingkawas kanato matud pa sa atong Manunubos. Busa, alang niadtong gustong makig-away, karong paskoha, ang akong tubag kaninyo mao ang akong sagad nga tubag sa mga tagay: “Pass sa ko. Pass ko”. Di ko makig-away kay, Pasko!
The Days of Christmas. Kanus-a ba gyud ang Pasko? Inigsud sa “ber” months? Inigsugod og tukar sa Christmas songs sa radyo? Tibuok bulan sa Disyembre? Disyembre hangtud sa Chinese New Year sa Pebrero? Daghang pangutana, daghang tubag.
Apan segun sa ahong pagpanukiduki, ang kantang 12 Days of Christmas mao’y husto. Napulo ug duha ka adlaw ang Pasko ug napulo ug tulo ka gabii nga magsugod sa Christmas Eve kon gabii sa Disyembre 24 hangtud na kini sa Enero 6 kon Three Kings o Three Magi. Mao kana ang hustong 12 days of Christmas.
Kanang uban negosyo na na. Sa Iningles pa, the longer the yuletide season, the better for business. Di man na dautan ang negosyo, pero sa mga ingon namo nga laktod lang empleyado, pait og sige ta’g kuot.
Life-saving Pinaskuhan gikan sa Kultura:
Batok sa Lamok – ang lemon-flavored dishwashing liquid sagulan sa tubig ug ibutang sa platito mo-attract sa mga lamok aron pag-inum niini ug mopahulay sa dayon ang lamok.
Pagpataas sa blood platelets – ang juice sa nilaga nga ganas sa kamote ug bisan ang salad sa ganas mismo makapataas sa blood platelets. Aduna kitay nailhan nga mga doktor nga dili usab sila supak kung paimnon sa nilagang dahon sa tawa-tawa ang biktima sa dengue.
Apan gikan gayud sa usa ka scientist nga akong personal nga higala nga nagtuon sa Alternative Medicine didto sa Germany, mao kini ang iyang simple’ng tambag alang sa pagpataas sa blood platelets (An apple a day keeps the doctor away):
Paniti ang mansanas (apple); kuskusa ang unod; pasagdi sa pipila ka minutos hangtud nga ma-brown ang color sa kinuskus; inig-ka-brown, ipakaon sa pasyente. Pakan-a kutob sa mokaon pa siya.
Pagpa-inum sa tambal – matud pa sa akong higalang doktor, sa panahon nga matulog ang pasyente ilabi na sa mga oras sa gabii ug kaadlawon, ayaw kini pukawa aron lang patumaron sa tambal, kay matud pa niya, ang pagkatulog sa hustong panahon mas importante pa kay sa ordinaryong tambal.
Silent Night. Ang labing inilang Christmas song sa tibuok kalibutan sukad-masukad mao ang Silent Night.
Pangutana: Nganong sikat man kaayo ang Silent Night nga dinhi sa ato sa Pilipinas banha man kaayo ang Pasko, daghang music, daghang boto-boto!
Tubag: Tungod kay ang Silent Night gisuwat sa usa ka kompositor nga nagbase sa iyang kanta sa tinuod nga diwa sa Pasko ug dili sa commercial nga pasko sama dinhi sa ato.
Matud sa akong paboritong philosopher nga si Rudolf Steiner tinuod gyud nga ang napulo ug duha ka adlaw ug napulo ug tulo ka gabii sa Pasko nindot kaayo ang kamingaw niini ug haum kaayo alang sa pagpamalandong.
Kwedaw, kay bisan sa sud sa simbahan banha kaayo ang pasko. Unsaon pagpamalandong? Aw, kana, mao’y atong angay pamalandongan.
Dawata igsoon ang akong mga maayong panghinaut alang sa usa ka Makahuloganong Pasko ug Mahigugmaong Bag-ong Tuig! Hinaut nga hikaplagan ta si Kristo diha sa atong mga kasingkasing.
