ANG mga suliran dili angay nga maoy tinubdan sa kasubo, kasakit ug pagbangotan. Sa atong kinabuhi, mahimong makasinati kita ug mga babag, pagsuway ug mga gumonhap. Kini maoy makaguba sa atong tumong ug katuyuan. Makahatag kini ug kapakyasan sa katumanan sa atong mga damgo ug pangandoy. Dili sa tanang higayon nga sayon sagubangon ang mga pagsuway, apan ang tanan adunay kasulbaran. Hangtod nga tin-aw kanato ang mga suliran nga atong gisagubang, mahatagan kini ug tinud-anay nga pagtagad ug masulbad ra gihapon sa lahotay. Gikinahanglan lamang ang kalig-on ug pagsalig sa kaugalingon.
Mahimong adunay mga tawo nga walay problema, apan halos tanan nakasinati ug naghambin ug mga suliran. Daghan ang moingon nga samtang aduna pay kinabuhi, dili gayud malikayan ang mga problema. Tinuod kini ug maoy usa ka buhing kamatuoran. Daghang matang sa problema ug suliran. Panglawas, pangwarta, inadlaw nga panginahanglan ug uban pa. Dala kini sa pagpakabuhi. Ang kasulbaran sa matag problema mag-agad sa nagdala niini. Walay tawo nga hingpit ug maoy hinungdan nga adunay suliran ang matag usa. Ang pag-atubang sa mga problema ug pagsulbad niini maoy angay buhaton aron ang tawo malingaw sa iyang kinabuhi. Ang matag problema adunay sulbad.
Ang suliran sa panglawas nasinati sa halos tanan. Matud pa, ang lawas maoy puhunan. Kon makasinati ug suliran sa panglawas, hatagan gayud dayon kini ug pagtagad. Dili angay nga pasagdan aron dili mosamot ug mamahimong ulahi na unya ang tanan. Walay ikabaylo sa himsog nga panglawas ug panghunahuna. Lahi usab ang kahasol ug problema sa atong trabaho. Kasagaran niini adunay kalabotan sa atong pakigsandurot sa mga kauban sa buhat. Dili angayan nga maguba ang atong kaugalingon tungod lang sa ubang tawo. Kon adunay suliran nga sama niini, ato dayon kining atubangon ug dili angay palabyon.
Daghang higayon nga mobati kita ug kalaay sa kinabuhi. Bug-at ang atong paminaw sama nga gisangon ang kabug-at sa kalibotan. Dili kini kalikayan apan dili angayan nga maguba ang inadlaw natong kalihokan. Kon moabot kini kanato, dili angayan nga magpadala niini. Bunga lamang kini sa lawasnong kapuol ug mga dautang hunahuna. Ang tawo nga maningkamot aron makab-ot ang mga gipangindahay, dili kalikayan nga sungogon sa kapakyasan. Ang kapakyasan magdala ug mga pagtulun-an nga mahimong tipik sa daghang kasinati-an. Makapadugang kini ug kalig-on sa atong pagkatawo. Tun-an nga maayong modula sa kapakyasan. Mga dayandayan lamang kini sa pagpakabuhi.
