NAGHINAY-HINAY na ang lalawigan sa Bohol sa pagpatuman sa Public Utility Vehicle Modernization Program (PUVMO) nga gilusad sa nasudnong kagamhanan niadtong 2017, matod pa sa opisyal sa usa ka local transport group.
Matod ni Jojo Baritua, consultant sa Bohol Transport Cooperative (BTC), ang Bohol nabiyaan na sa mga silingang probinsiya sama sa Sugbo bahin sa paggamit sa modernized jeepneys.
Matod niya napakyas ang mga local government units sa paghimo ug pagpatuman ug ordinansa kalabot sa Local Public Transport Route Plan (LPTRP), nga gikinahanglan sa mga ahensya sa pagpondo sama sa Land Bank of the Philippines ug Development Bank of the Philippines (DBP).
Hinuon, si Baritua mipadayag og pagkamalaumon nga ang pagpatuman sa PUVMO makaangkon og alisngaw ubos sa administrasyon ni Gobernador Aris Aumentado.
Matod ni Baritua, suportado ni Aumentado ang paningkamot sa transport groups nga ma-modernize ang ilang jeepney fleets.
Nanghinaut si Baritua nga ma-deploy na nila ang modernized jeepneys sa sunod tuig.
Matod niya nga ang BTC ni-apply na og provisional authority gikan sa Land Transportation Franchising and Regulatory Board alang sa dugang mga rota.
Lakip sa gi-aplay mao ang Tagbilaran-Alburquerque nga rota alang sa 19 units, Tagbilaran-Loay alang sa 15 units, Tagbilaran-Dauis alang sa 19 units, Tagbilaran-Manga alang sa 18 units ug “Metro Tagbilaran route” alang sa 15 units. (RTB)
