159 ka tuig kanhi, tuig 1863, gitukod ni Ellen White ang simbahang Adventist nga gisentro sa pagpangandam sa katapusan sa kalibutan ug pagbalik sa atong Ginoong Hesu Cristo. Kadaghan na nila tag-naa nga matapos ang kalibutan, apan wa gihapon hangtud karon.
Ayaw sa mog ambak sa laing relihiyon uban sa pamasin nga maluwas mo kon matapos na ang kalibutan. Nakalimut na ba diay mo nga sa pagtungtung sa tuig 2000 perteng daghanang nangandam kay milenyum na lagi kuno ug matapos na ang kalibutan. Wa kini mahitabo.
Ang labing bag-ong panagna mao kadtong December 21, 2012. Duna pa gani gihimong pelikula bahin niini. Milabay ang maong petsa ug sa gihapon walay nahitabo. Tinuod nga dihay panagna sa mga katigulangan nga ingon niini didto sa Mexico, ilabi na sa mga American Indians, usa ka tribu nga giila sa ngalang Mayans. Hinuon, lahi ang atong pagsabut sa maong panagna. Alang kanato, daghan ang mahimong kahulugan sa maong panagna.
Usa ka paagi paghubad niini gibatbat sa usa ka modernong propeta ug magtutudlo nga taga-Bulgaria, si Michael Aivanhov. Matud ni Aivanhov ang kalibutan matapos alang sa tagsa-tagsa kanato sa higayon nga kita mamatay; ug samtang kita buhi pa, ang kalibutan ato pang makita. Midugang siya pag-ingon nga aduna man gani’y mga tawo nga bisan nag-ginhawa pa sila, daw sa natapos na ang kalibtan alang kanila. Sa laing pagkasulti, segun sa imong kahimtang ug panglantaw sa kinabuhi, ang kalibutan mahimong patay o buhi alang kanimo.
Laing paghubad sa maong panagna pinaagi sa science. Usa ka scientific nga paghubad naga-ingon nga matag segundo ang atong mga cells sa lawas mamatay ug pulihan og bag-o. Ug paglabay sa pito ka adlaw bag-o na tanan ang cells sa atong lawas. Sa ato pa, matag pito ka adlaw matapos ang kalibutan sa atong mga daang cells ug makumpleto usab ang bag-ong kondisyon sa atong lawas bisan wa nato kini himatikdi. Tan-awa ang imong mga litrato sa bata ka pa; hain na man kanang dagwaya? Natapos na. Patay na. Dili na kana ang imong lawas karon. Ug bisan pito ka adlaw gikan karon, bag-o na usab ang tanan sa imong lawas. Unya, mangutana ka, nganong mao man lagi gihapon akong dagway? Aw, laing topic na pud na nga atong hisgutan puhon.
Aduna bay mahitabong Ikatulong Gubat sa Kalibutan nga maoy makatapos sa tanang kinabuhi? Atong pangagpas, dili. Daghan tingaleng mga kausaban, apan dili pa kini makatapos sa kalibutan. Basahon ta ang Balaang Kasulatan, Mateo 35 ngadto sa 51:
“Ang langit ug yuta mahanaw, apan ang akong pulong dili makawang. Walay nasayod kanus-a moabot kanang adlawa ug orasa. Bisan ang mga anghel sa Diyos o ang Anak. Ang Amahan ray nasayod.
“Ang pag-abot sa Anak sa Tawo sama sa panahon ni Noe. Sa wala pa ang lunop, ang mga tawo nangaon ug nanginom. Nagminyoay sila hangtod sa adlaw nga si Noe misakay sa Arka. Apan wala sila mahibalo unsay mahitabo hangtod nga miabot ang lunop ug gibanlas sila. Mao pod unya inig-abot sa Anak sa Tawo. Sa duha ka tawo sa uma, ang usa kuhaon ug ang usa ibilin. Sa duha ka babaye nga maggaling og trigo, ang usa kuhaon ug ang usa ibilin.
“Busa, pagtukaw, kay wala hibaloi unsang adlawa moabot ang Ginoo. Hunahunaa ni: kon ang tag-iya sa balay nasayod nga ang kawatan moabot sa kagabhion sa takna nga gitagal, magtukaw siya aron dili makasulod ang kawatan. Hinunoa, pag-bantay, kay ang Anak sa Tawo moabot sa takna nga wala ninyo damha.
“Hunahunaa ang maunongon ug maalamong sulugoon nga gipiyalan sa agalon sa pag-atiman sa panimalay aron pag-andam sa pagkaon sa hustong panahon. Bulahan ang sulugoon nga nag-atiman sa buluhaton inig-abot sa agalon. Sa pagkatinuod sultihan ko kamo: piyalan siya sa agalon sa tanan niyang gihuptan.
“Dili sama sa daotang sulugoon nga naghunahuna: Nalangan ang akong agalon. Unya, daugdaogon niya ang isigkatawo samtang nakigsalo ug nakig-inom siya uban sa mga palahubog. Apan moabot ang iyang agalon sa adlaw ug takna nga wala damha. Ug papahawaon ang maong sulugoon. Mosangko siya sa gidangatan sa tigpakaaron-ingnon. Didto tua ang bakho ug kagot sa ngipon”.
