Nobel Prize. Si Alfred Bernhard Nobel, gianak didto sa Sweden niadtong Oktubre 21, 1833. Naningkamot siya ug nahimong usa ka chemist ug engineer nga maoy nag-imbento sa dynamite. Atul sa pag-testing sa maong imbensyon nabuthan ang lima ka tawo ug lakip sa namatay ang usa niya ka igsoon nga ginganlag Emil.
Nadato si Alfred Nobel tungod sa iyang mga paningkamot, ilabi na sa iyang naimbento nga dinamita. Apan tungod usab niini daghang tawo ang nangamatay.
Busa sa dihang namatay ang laing igsoon ni Alfred nga ginganlag Ludvig, nasayup ang mga pamantalaan og ilang gibalita sa headlines nga “The merchant of death has died” kay nakaingon sila nga si Alfred ang namatay.
Tungod niini natandog si Alfred ug misuwat siya sa iyang Last Will and Testament diin iyang gimando nga sa higayon nga siya na ang mamatay ang iyang katigayonan gamiton aron paghatag og premyo niadtong mga tawong makatabang pagpalambo sa kalibutan pinaagi sa ilang outstanding achievements sa physics, chemistry, medicine, literature, peace, ug economics.
Ang batikang Journalist nga si Maria Ressa sa Rappler.com maoy unang Pilipinhon nga gigantihan sa Nobel Peace Prize tungod sa iyang pagbarug alang sa kamatuoran ug demokrasya.
Si Gandhi ug ang balo nga nagbangotan. Daghang mga tawo ang moduol kang Mahatma Gandhi aron magpatambag bahin sa ilang mga suliran sa kinabuhi.
Usa ka adlaw niana, usa ka bawo ang miduol kaniya ug miingon: “Sir, tabangi ko kay perte nako’ng guola sukad nga namatay akong bana. Unsay akong buhaton aron maulian ko?”.
Mitubag si Gandhi: “Sige, suruya ang tanang panimalay sa inyong baryo ug pangayo’g bugas sa kada balay nga imong masak-an diin wa pay namatay”.
Paglabay sa tulo ka adlaw mibalik ang babaye kang Mahatma Gandhi. Nangutana si Gandhi: “Kumusta na man, hain na man ang imong pinangayo’ng bugas?”. Mitubag ang babaye: “Salamat Sir, naayo na ko. Wa ko’y nada’ng bugas pero naka-amgo na ko nga ang tanang panimalay namatyan naman gyud diay”.
Matud ni Mahatma Gandhi ang pito ka labing makalilisang nga sala mao ang: Bahandi nga naangkon dili bunga sa paningkamot, kalipay nga way konsensya, kahibalo nga way maayong kinaiya, negosyo nga way moralidad, siyensya nga dili makitawhanon, pagsimba nga way sakripisyo, ug politika nga way prinsipyo.
