ANG censorship mao ang pagpahunong, pagputol o pagpapas sa mga sinuwat, sinulti, salida, o bisan unsang materyal sa komunikasyon nga wa magustohi sa mga awtoridad, gobyerno o organisasyong adunay gahum paghimo niini.
Adunay nagkalain-laing matang sa censorship. Adunay political censorship diin ang gobyerno o gamhanang politiko mohikaw sa pipila ka impormasyon ngadto sa iyang mga citizens. Sounds familiar? Adunay moral censorship nga kasagaran ipatuman kon ang usa ka salida gikonsiderar na nga pornograpiya. Adunay military censorship diin ang militar dili gusto’ng ibutyag ang mga impormasyon nga posibleng makaapekto sa ilang intelligence work. Adunay religious censorship sama sa nahiaguman niadtong usa ka salida diin gipakita nga mihalok si Hesus sa ngabil ni Maria Magdalena. Ug adunay corporate censorship diin ang mga dagkung kompanya motago sa impormasyon nga ilang gilantaw nga makadaut sa ilang negosyo.
Ang labing bag-ong matang sa censorship mao ang Internet Censorship. Kini kombinasyon sa political ug corporate censorship. Nahiaguman kini karong bag-o pa lang sa kinakusgang Internet Search Engine nga gitawag og Google didto sa China. Ang kagamhanan sa China nga gihari-an sa bugtong political party didto nga mao ang Chinese Communist Party (CCP) mipugong sa Google pagpakita sa mga impormasyon kabahin sa mga sensitibong isyu sama sa Massacre didto sa Tiananmen Square, Tibet Independence, Taiwan Independence, ug uban pa’ng susamang impormasyon. Gibuhat kini sa gobyerno didto sa China pinaagi sa pagbutang og usa ka Internet “firewall”. Pamaagi kini sa teknolohiya aron dili makatan-aw ang mogamit sa Internet sa mga sensitibong impormasyon. Busa, gitawag kini sa mga journalists nga, “The Great Firewall of China”.
Ang atong panultihon karong Domingoha gikan sa 1 Juan 4:8: “Kinsa kadtong wala mahigugma wala makaila sa Dios, kay ang Dios gugma man”.
