LABING taas nga pahat alang sa pagpa-haum ug pagpangandam aron dili magrabehan sa epekto sa nagkausab nga panahon ang gitagana sa Department of Budget and Management (DBM) alang sa fiscal year 2023.
Matud sa DBM, ang labing taas nga P453.11 billion alang sa climate change adaptation and mitigation alang sa 2023 National Expenditure Program (NEP), labaw og 56.4 porsyento kon itandi sa miaging tuig nga anaa ra sa P289.73 billion.
Sumala sa Climate Change Expenditure Plan, ang mga pundohan nga proyekto alang sa Water Sufficiency projects miangkon sa P264.89 bilyones.
Sa laing bahin, ang pundo alang sa malungtaron nga kahinguhaan sa gahum o Sustainable Energy ug pagpalig-on sa tinubdan sa pagkaon o Food Security padayon nga may kasaligan nga P131.51 bilyones ug P40.78 bilyones nga pahat.
Matud sa DBM, ang mga gastohonon alang sa climate change magpadayon nga hatagan og prayoridad ilabi na sa dagkong programa sama sa Flood Management Program sa Department of Public Works and Highways (DPWH), nga sa pagka karon, may P168.9 bilyones nga pahat.
Dinhi magagikan ang pundo alang sa pagpatukod ug pagpahiuli sa mga estraktura nga magpalikay ug magpakubos sa epekto sa lunop pinaagi sa katukoran sa mga kanal nga kaagian ug kapahubsan sa tubig nga matapok.
Dugang pa, may P2.49 bilyones usab nga napahat alang sa National Greening Program sa Department of Environment and Natural Resources (DENR).
Kini gitumong alang sa pagpatanum sa 6.18 milyones nga lawngon didto sa 11,631 ka ektarya nga kayutaan nga wala pa magamit.
Lakip na usab sa gipahatan ang Protected Areas Development and Management Program, ug ang Management sa Coastal ug Marine Areas.
Matud ni DBM Secretary Amenah Pangandaman “Ila na nga nalista ang average sa 21.3 porsyento sa pagdaku sap undo nga kakuhaan sa mga galastohan alang s a climate-related expenditures gikan sa 2015 ngadto sa 2023.”
Uban sa pagpakig-alayon sa atong nga ahensya nga maoy mopatuman sa napahat, ug sa matag usa ka Pilipino, mahimo nato nga alayonan ang pagpaningkamot nagdto sa climate resiliency aron mapaseguro nato ang malungtaron nga kaugmaon alang sa nasud. (RAHC/PIA7 Bohol)
