ANG kompirmasyon sa upat ka mga tawo nga gitudlo ni Gobernador Aris Aumentado nga morepresentar sa kagamhanang probinsiyal isip mga board of directors sa Bohol Light Company, Inc. (BLCI) ug Bohol Water Utilities, Inc. (BWUI) anga matawag nga “as good as approved. ”
Matod pa sa ikaduhang labing-taas nga opisyal sa Bohol, Dionisio Victor Balite nga walay bisan usa sa mga sakop sa Provincial Board (PB) ang misupak sa kompirmasyon atol sa ilang pre-session discussion sa nakalabay nga Hulyo 19.
Ang pagtudlo nila ni Norris Oculam, Argeo Melisimo, Dominic Butalid ug abogado nga si Donnie Piquero opisyal nga makompirmar atol sa sunod nga regular session sa PB karong Hulyo 26, 2022.
Ang tanang tinudlo, gawas kang Piquero nga nakigkita sa mga sakop sa PB sa miaging semana, niatubang sa mga magbabalaod atol sa pre-session conference.
Matod ni Bokal Jiselle Villamor, wala na siya ug iyang mga kauban nangutana sa mga appointees tungod kay ang ilang gibasehan sa ilang desisyon sa pagkumpirma sa ilang appointment base man sa ilang credentials.
Kaniadto nitumaw ang mga pangutana bahin sa pagkatudlo ni Butalid apan nasulbad kini sa dihang gipasabot sa Provincial Legal Office (PLO) nga dili siya sakop sa usa ka tuig nga pagdili sa mga mapildi nga kandidato sanglit dili siya motrabaho isip regular nga empleyado sa kagamhanang probinsiyal.
Sa sayo pa, ang chief of staff ni Aumentado nga si Jun Amora nagkanayon nga ang gobernador mihimo og punto sa pagpili sa mga lumad sa Bohol nga morepresentar sa interest sa kagamhanang probinsiyal ug sa mga Boholano sa mga board sa duha ka utility companies.
Matod niya nga gikonsiderar usab sa gobernador ang ilang mga kredensyal sa paghimo sa mga appointment.
Si Melisimo, usa ka beterano nga bangkero ug ang bise tsirman sa First Consolidated Bank, molingkod sa board of directors sa BWUI kauban si Oculam, kinsa mao ang tsirman sa Oculam Property Management, Inc.
Sa laing bahin, sila si Butalid kinsa maoy presidente sa Tagbilaran Maternity Hospital Group, ug Piquero, usa ka practicing lawyer ug kanhi faculty member sa Holy Name University maoy molingkod sa board of directors sa BCLI. (RTB)
