NANGHINAOT ang pipila ka kapitan sa Tagbilaran City nga mas maayo nga sayohon ang pagdesisyon kung isibog ba gyud o dili ang piniliay sa barangay ug Sangguniang Kabataan (SK).
Si kapitan Arlene Karaan sa Poblacion I niingon nga pabor siya nga i-uktaba lang una ang piniliay aron mapadayon ang ilang mga proyekto.
Kini gumikan kay sa milabay nga duha ka tuig nabaraw ang pipila nila ka proyekto gumikan sa nasinate nga pandemya.
Samtang si kapitan Allan Real sa Pobalcion II nitataw nga kung mahimo sa kongreso ug sa senado makadesisyon na sila kung unsay ilang baruganan labot ining piniliay sa SK ug barangay sa sayo pa.
Aron sab sila makaandam kung adunay piniliay ug kung e-postpone man gani makapadayon sila sa ilang mga plano alang sa kaayohan sa barangay.
Una niini, si kongresista Vanvan Aumentado sa segundo distrito miingon nga siya mosuporta sa pag uktaba sa piniliay aron ang pundo nga gamiton sa eleksyon magamit sa ubang proyekto nga himuon sa gobyerno. (RTB)
HIMUON SA KONGRESO
Posibleng lugwayan ang termino sa kasamtangang opisyal sa Barangay sa 19th Congress diin gikatakda ang piniliay sa Disyembre 5, 2022.
Si Bohol second district CongW. Vanessa Cadorna-Aumentado subling nipahibalo ning pamantalaan nga sa pagbukas pag-usab sa sesyon sa Kongreso (19th Congress) ugma Hunyo 25, ila nang atimanon ang pag-postpone sa Barangay ug Sangguniang Kabataan Elections ngadto sa Mayo 2023 o sa Disyembre sa samang tuig.
Nasayran ni CongW. Aumentado nga gusto lugwayan sa iyang mga kaubanan ang termino sa Barangay kay mubo ra kaayo ang ilang tulo ka tuig nga paglingkod ug suportado kini niya.
Matod niya kung dili madayon ang barangay ug SK elections sa Disyembre, aduna nay ₱11-B savings ang gobyerno nga magamit sa infrastructure program sa gobyerno. (RTB)
