SI Vice President Sara Duterte nakigtagbo sa mga opisyal sa Department of Education didto sa lungsod sa Clarin gahapon atol sa iyang pagbisita sa Bohol Day celebration.
Gibisita sa bise presidente ang Clarin National School of Fisheries human sa iyang paghidangat dinhi sa Bohol wala pa ang kalihokan sa Bohol Cultural Center diin siya ang pinasidunggang dinapit sa ika 168 nga kasaulogan sa Bohol Day, Hulyo 22, 2022.
Ang bise presidente gitagbo ni Clarin Mayor Eugeniano Ibarra, Vice Mayor Frenz Camacho , DepEd-7 Regional Director Salustiano Jiminez, DepEd Bohol Supt. Bianito Dagatan ug ubang mga personahe.
Gipahigayon sa bise-presidente nga mao usab ang kalihim sa DepEd ang “Meet and Greet” with dialogue sa mga piniling mga magtutudlo gikan sa mga tunghaan sa elementarya, senior high school ug gikan sa Clarin National School of Fisheries, nga maoy nag unang nagrabehan sa pag-igo sa bagyong Odette.
Kini maoy rason nga didto gipahigayon ang tigom sa bise presidente ug mga opisyal sa DepEd.
Lakip sa ilang gihisgotan mao ang kalabot sa face-to-face classes preparation, infra projects sama sa mga classrooms, vaccination sa mga estudyante kon mahimo ug uban pa. (rvo/ErnPahayahay)
