NAGPABILIN nga luwas gikan sa African Swine Fever (ASF) ang lalawigan sa Bohol base sa ASF Zoning Status nga giluwatan sa Bureau of Animal Industry sa katapusan sa Hunyo.
Ang Bohol maoy usa sa pipila ka lugar sa nasud nga nagpabilin nga ASF-Free.
Una niini, ang Provincial Veterinary Office (PVO) uban sa National African Swine Fever Prevention and Control Program (NASFPCP) ug sa Regional Veterinary Quarantine Station RVQS sa Central Visayas nipahigayon og tigom aron hisgotan balik ang mga gipatuman nga lakang batok sa ASF niadtong Hulyo 12.
Apil sa gihisgutan ang bantay ASF sa Barangay (BABay ASF) Program, guidelines sa animal movement ug uban pa.
Nagkanayon ang kapitolyo nga dako ang natampo sa mga pribadong sector aron mapanalipdan ang binilyon nga hog industry sa lalawigan sa Bohol.
Si gobernador Arsi Aumentado una nang nagkanayon nga ipabilin lang gihapon nya ang iyang kamandoan pagdili sa pagpasulod sa buhing baboy ug mga produkto gikan sa mga lugar sama sa Luzon ug Mindanao ug ubang nasud nga adunay kaso sa ASF padulong dinhi. (RTB)
