DILI igu nga supak kita sa kasaypanan ug pagka-way-kabangkaagan; kay ang pagbatuk lamang niini naghatag og ilhanan nga ang kasaypanan ug pagka-way-kabangkaagan mga aktibong pwersa sa kalibutan samtang kita usa ka hugpong nga walay tumong gawas lamang sa pagsupak niini. Imbis nga atong supakon ug sawayon ang gipasiatab sa uban isip ilang kamatuoran, ang mga makinaadmanong tawo motanyag sa ilang kaugalingong kamatuoran. (The American Theosophist)
Ang kalibutan karon giharian sa pamulitikang kalibutananon; apan tingale kasagaran kanato wala masayud nga adunay pamulitikang langitnon. Kini milihuk dili pinaagi sa gahum, kon dili, pinaagi sa ispiritu; usa ka matang sa Ispiritu kansang maluswanong gahum nanukad sa pag-antus sa tawo alang sa iyang isig-ka-ingon, ilabi na niadtong nagpasipala kaniya, agig pagsunod sa balaang sugo paghigugma sa tanan isip igsoon. Ang maong gugma daku ang kalainan sa atong kalibutanong gugma diin kita nahigugma sa nahigugma kanato, ug nagbuhat sa maayo ngadto sa nagbuhat usab kanato sa maayo. Ang kinauyokan sa langitnong gugma wala maglantaw sa kasigurohan nga kini molampus, ug nga kini sayon, o barato lang, ni man gani nga kini suklian sa samang gugma. Kon kini sundon sa katawhan ug kanasuran mahimong kini makasinati sa pagsupak, pagdumot, pagbiay-biay ug kapildihan. Segun sa mga pulong nga kinutlo sa Ebanghelyo, ang maong gugma maantuson, kanunayng buotan, ug dili mapakyas. Mao kini ang Ispiritu nga makabuntog sa kalibutanong gahum. (Religious Society of Friends, Quakers)
Ang publiko dili mapasalamaton ug dali rang makalimut; kon ikaw usa ka tawong maalamon, nganong ibutang mo man ang imong kaugalingon sa peligro alang sa mga buang? (Unto Thee I Grant)
Ang atong panggobyerno nanukad gayud sa kahimtang sa atong ispiritu. (Bhai Ahimsa)
Ang matag buhat nga bayolente usa ka testamento sa tawhanong kahuyang. (Johann Galtung)
