OPISYAL nang gipahunong sa Provincial Legal Office ang operasyon sa usa ka minahan sa bulawan sa Barangay Kauswagan, lungsod sa Trinidad, human sa rekomendasyon sa Bohol Mineral Resources Regulatory Office (BMinRRO).
Matud ni Col. Eduardo Malig-on, hepe sa BMinRRO Task Force, gihimo ang maong lakang tungod sa grabeng kabalaka sa kaluwasan sa mga trabahante. Nakita sa inspeksyon nga gipasagdan ang kahimtang sa pasilidad ug dili na luwas ang mga tunnel nga gigamit sa pagmina — nga dako og risgo nga mahimong hinungdan sa disgrasya ug pagkawala sa kinabuhi.
Bisan tuod nagpahayag og kadismaya ang mga residente nga naapektuhan ang ilang inadlaw-adlaw nga panginabuhian, gipasabot ni Malig-on nga mas prayoridad ang kinabuhi ug kaluwasan sa mga tawo kaysa sa dinaliang kita.
Gipasabot usab niya nga ang pagmina sa maong lugar sa pagkakaron ilegal pa kay wala pa maaprobahan ang aplikasyon aron madeklarar kini nga “Minahan ng Bayan” gikan sa Mines and Geoscience Bureau (MGB).
Magpabilin nga sirado ang minahan hangtod matul-id ang mga sayop, mapauswag ang mga kondisyon, ug makuha ang tanang gikinahanglan nga pagtugot ug permit aron masiguro ang luwas ug tarong nga pagpadagan niini. (RTB)
