OPISYAL nga mihangyo ang Sangguniang Panlungsod sa Tagbilaran, ubos sa pagpanguna ni Bise Mayor Adam Relson Jala, sa Department of Health nga dalion ang tanang proseso aron hingpit na nga makasugod sa operasyon ang gitukod nga pasilidad para sa mental health sa Governor Celestino Gallares Multi-Specialty Medical Center.
Ang hangyo gipagawas pinaagi sa resolusyon nga giduso ni Konsehal Butchie Zamora, pangulo sa Komite sa Panglawas, isip tubag sa padayon nga pagdaghan sa mga tawo nga nag-atubang og mga kalisod sa pangisip ug emosyon.
Bisan tuod gitukod na ang maong pasilidad sa Cortes aron maghatag og espesyal nga pag-atiman, wala pa kini hingpit nga naglihok. Tungod niini, napugos pa ang mga pasyente ug ilang pamilya sa pagpangita og tambal sa lagyong mga lugar — nga nagdugang sa gasto, kalisod, ug makapalangan sa dinaliang tabang nga gikinahanglan nila.
Giawhag sa konseho ang DOH nga tapuson na dayon ang tanang kinahanglanon: gikan sa mga dokumento, pagkuha og lisensya, pag-andam sa mga kawani ug kagamitan, hangtod sa paghatag sa igong pondo. Ang tumong mao ang masiguro nga adunay dali, duol, ug baratong serbisyo para sa matag Bol-anon nga nagkinahanglan og suporta sa pangisip. (RTB)
