OPISYAL nang gikumpirma ni Bohol 2nd District Representative Maria Vanessa “Van-Van” Aumentado nga wala na siya naghupot sa katungdanan isip Chairperson sa House Committee on Ecology, human sa pagbag-o sa mga liderato sa komitiba atol sa sesyon sa Kamara niadtong Lunes.
Matod ni Aumentado, ang maong pag-ilis nahitabo taliwala sa daghang mga kausaban sa mga katungdanan sa ubang mga kongresista — diin kadaghanan kanila mao kadtong nibotar og “No” sa proseso sa impeachment batok kang Bise Presidente Sara Duterte. Sama kanila, nibotar usab og dili pabor si Aumentado, nga iyang gibase sa tinguha ug tingog sa kadaghanan sa mga lumulupyo sa Ikaduhang Distrito nga dili gustong mapalagpot ang Bise Presidente.
Bisan tuod nawala ang katungdanan isip tigulo sa komite, nagpabilin gihapon siya isip miyembro sa ubang mga komitiba sa balay-balauranan. Wala pa nagpagawas og opisyal nga katin-awan o rason ang liderato sa Kamara nganong gihimo ang maong dako nga pagbag-o sa mga katungdanan.
Usa sa dagkong buhat nga iyang gipasiugda ug gipangulohan isip tigulo sa Ecology Committee mao ang Waste-to-Energy Act — usa ka gihiusang balaodnon nga nagtumong sa paghimo og saktong pamaagi sa paggamit sa basura aron mahimong tinubdan sa enerhiya sa tibuok nasud. Bisan pa sa nahitabong kausaban, nagpabilin siyang usa sa mga nag-unang tigpasiugda niini aron kini mahimong hingpit nga balaod. (RTB)
