ANG pagsulti sa kamatuoran lahi sa pagpanaot.
Ang pagsulti sa kamatuoran mao ang paghatag og kagawasan sa atong kaugalingong konsensya, ug aron masayod ang katawhan.
Samtang ang pagpanaot mao ang pagsulti sa tinumo-tumo o dili tinuod.
Anaay mga tawo nga bisan unsaon nimo og pagpasabot sa tinuod nga panghitabo, dili gayud musabot. Sirado ang salabutan.
Panahon sa pagpangampanya, nisulti ko sa mga butang nga akong nahibaw-an nga tinuod gayud. Anaay bitbit nga ebidensya.
Kinahanglan masayod ang katawhan kay apil man sila sa maong istorya ilabina sa atong pang-gobyerno.
Apan ang uban nga mura’g apektado o apektado gayud sa atong istorya, ingnon lang ta nga “namulitika”.
Usahay, i-agi na lang nato sa katawa ang atong kapungot. Makapungot bitaw nga nangisog ta sa pagbarog sa pagsulti sa tinuod apan dili tuohan.
Ang Balaang Kasulatan nag-ingon nga kinahanglan mahibawo ang katawhan sa tinuod o “maayong balita” kabahin sa Ginoo.
Usa kini ka responsibilidad sa tawo, kay lage, managsuon kitang tanan sa Mata sa Diyos.
Apan kun gibuhat na nimo ang tanan apan dili ka tuohan, wala na kay tulubagon sa Ginoo.
Ang atong pagsulti sa tinuod mao ang paghatag og higayon nga makamata sa reyalidad ang katawhan nga atong gisuginlan.
Apan sa nakalabay nga Piniliay, anaay mga tawo nga ang trabaho magpakatap og hiwi o balak o mga malisyosong isyu.
Subo hunahunaon nga anaay mga kauban sa media nga nagpailawom sa mga pulitiko nga kawatan, abusado ug limbungan aron lang makakuwarta. Luoy intawon — ilang gipakaon ang ilang pamilya sa kuwarta nga gikan sa dinautan nga paagi.
Isip sakop sa media, dako nakong responsibilidad ang paghatud sa kamatuoran o tinuod nga mga panghitabo nga konektado sa katawhan ug sa estado.
Sa akong pag-scroll-scroll sa social media, sa Facebook, nalipay ko nagbasa nga anaay mga sakop sa media nga nagpalandong sa kuwarta aron atakehon ang mga kaatbang sa ilang mga agalong pulitiko, nga nangayo og pasaylo sa mga pulitiko nga ilang giatake.
Apan anaay uban nga gahi pa sa asero ang dughan kay dili gayud mudawat sa ilang kasaypanan ug gipatigbabaw ang garbo.
Ang garbo dili makatabang sa atong kinabuhi. Dili usab kana makaluwas sa imong kalag.
Samtang buhi pa ta, nagpitik pa ang atong kasing-kasing, mangayo ta og pasaylo sa atong nabuhatan og dili maayo. Pasayluon ang mangayo og pasaylo.
Timan-i: kitang tanan anaay kinutuban. Ug walay mulabaw kanato sa Timbangan sa Labaw’ng Maghuhukom panahon sa Paghukom. Patas kitang tanan sumala sa atong binuhatan, maayo man o dili.
Hinaot mapukaw ang uban nga mga garboso ug garbosa. Ayaw intawon pagpakataas.
Sa mga giludhan ang kuwarta, ayaw na kana himuang “diyos”. Ug ayaw himuang gingharian ang imong lingkuranan diha sa opisina de gobyerno.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
