NAPUNO sa kabalaka ang mga residente sa Isla sa Tintinan, Ubay human ang duha ka mga langyaw nidunggo sa ilang dapit gamit ang usa ka pumpboat kaniadtong Huwebes sa gabii.
Sumala sa residente, ang maong mga langyaw nipakita og mga pasaporte gikan sa France, apan ang ilang presensya naghatag og kahadlok sa mga lumulupyo tungod sa katingad-an nga paagi sa ilang pag-abot sa gamay nga isla.
Gibutyag sa mga residente nga ang mga langyaw nangangkon nga nahutdan sila og krudo samtang naglawig, hinungdan nga napugos sila sa pagpahunong sa ilang sakyanan sa dagat ug natulog na lamang sa baybayon gabii.
Bisan pa sa ilang rason, wala malikayi sa mga residente sa dapit ang pagduhaduha ug pagduda nga tingali duna kini laing katuyoan o nagsilbing mga “spy,” ilabi na nga talagsaon ang makakita og mga langyaw nga maglawig gamit ang gamay nga pumpboat paingon sa maong isla.
Sa pagkakaron, wala pa’y opisyal nga report o pamahayag ang kapolisan sa lungsod sa Ubay mahitungod sa tinuod nga pagkatawo ug sitwasyon niining mga langyaw.
Padayon ang panawagan sa mga residente ngadto sa mga awtoridad nga paspas nga imbestigahan ang maong insidente aron maseguro ang kaluwasan sa tibuok komunidad sa Isla sa Tintinan. (RTB)
