GIKLARO ni Provincial Legal Officer Atty. Handel Lagunay nga walay kamatuoran ang pasangil nga ilang gisupak ang mando sa korte may kalabotan sa Writ of Mandamus alang sa pagguba sa gate sa Dumaluan Beach Resort sa Bolod, Panglao.
Gitubag ni Lagunay ang lakang sa complainant nga si Jacques Chaoulli nga pasakaan sila og indirect contempt human wala madayon ang demolisyon nga gikatakda unta niadtong Marso 13.
Matod ni Lagunay, andam na unta ang probinsya sa pagpatuman sa maong mando, apan nihangyo ang kampo ni Dumaloan og katin-awan.
“Ato lang klaruhon, wala namo gi-disobey ang order sa court to implement the order of writ of mandamus, it’s still there, ready na mi pag March 13, but nihangyo si Dumaloan, nga kung mahimo mangayo sila og clarification. Ato nang gi-accommodate,” pasabot sa abogado.
Dugang niya, nipahibalo ang abogado ni Dumaloan nga ang kliyente na mismo ang boluntaryong moguba sa mga ali o hindrances.
Gipasabot ni Lagunay nga gihatagan nila og duha ka semana nga timeline ang tag-iya sa resort aron tumanon ang saad niini, apan kinahanglan nga anaa ang presensya sa probinsya ug ni Mayor Edgardo Arcay sa paghimo niini.
“Akong giingnan nga that is good pero make sure nga i-inform mi kung inyo nang i-carried out nga naa si Mayor Arcay kami, because kami raba ang gi-orderan sa court, we should be there,” matod ni Lagunay.
Gidugang usab niya nga kung mapakyas ang resort o malangan ang implementasyon, andam ang probinsya nga mopadayon sa demolisyon, busa wala silay nakitang basehan para sa contempt.
Sa laing bahin, natingala usab si Lagunay ngano nga giapil sa complainant si Retired Judge Susing Arcamo sa maong reklamo.
Sumala kaniya, si Arcamo pa gani ang nirekomendar nga dili mosugot sa hangyo sa kampo ni Dumaloan nga sila ang moboluntaryo og guba.
“In fairness to Judge Susing Arcamo, ang iya man galing advise is, ayaw og sugot sa hangyo nga sila maoy mo-boluntaryo og remove, so I don’t see any justification nganong giapil-apil si Judge Arcamo,” panapos ni Lagunay.
HULGA SA ‘INDIRECT CONTEMPT’
Gibutyag sa complainant nga si Jacques Chaoulli nga hingpit na niyang ipasaka ang petisyon alang sa Indirect Contempt batok sa mga labing tag-as nga opisyal sa lalawigan ug uban pang mga personalidad.
Lakip sa gipangalanan nga mga respondent mao sila si Governor Erico Aris Aumentado, Provincial Legal Officer Atty. Handel Lagunay, Mayor Boy Arcay, retired Judge Susing Arcamo, ug si Dr. Doloriech Dumaloan.
Suma ni Chaoulli, naapil si Arcamo sa maong reklamo tungod sa giingong pag-apil-apil niini isip adviser ni Atty. Lagunay bisan kon wala na kini otorisasyon sumala sa iyang tan-aw.
Gisaysay ni Chaoulli nga niadtong Marso 13, miadto sila si Atty. Lagunay ug Mayor Arcay sa maong site aron unta i-implementar ang Writ of Mandamus, apan wala kini madayon.
Matod sa complainant, ang mga opisyal daling nikuha sa rason ni Dr. Dumaloan—nga dili man unta respondent sa maong writ—nga nag-ingon nga “dili klaro” ang kamandoan sa korte.
Gihulagway ni Chaoulli nga katingad-an ang pag-uyon sa gobyerno sa maong rason aron lang dili mapatuman ang demolisyon, ilabi na nga ang Writ of Mandamus na-isyu pa niadtong Nobyembre 11, 2025, ug “final and executory” na tungod kay wala man kini i-apelar sa mga respondent sulod sa 15 ka adlaw nga gitagal sa balaod.
Bisan pa sa iyang kapungot, nakahukom si Chaoulli nga i-postpone una ang pag-file sa kaso aron hatagan og higayon ang mga opisyal sa paglihok.
Mihatag siya og ultimatum hangtod sa Abril 13, 2026, aron hingpit nga maabli ang barangay road ug maguba ang gate sa Dumaloan Beach Resort.
Gipasalig ni Chaoulli nga iyang iatras ang petisyon kon matuman ang demolisyon, apan kon “partial” lang ang paguba o kon magpabilin gihapon ang gate sa maong dapit, iyang idayon ang pagpasaka sa kaso aron panubagon ang mga nalambigit sa giingong pagbaliwala sa mando sa korte. (RTB)
