GIPANGUNAHAN ni Mayor Neil Balite ang opisyal nga paglusad sa Paleng-QR Ph Plus sa lungsod sa Valencia. Kini naghimo sa Valencia nga ikaduhang LGU sa Bohol sunod sa Tagbilaran City, ug sa samang higayon mao usab ang unang lungsod sa tibuok probinsya nga nakapatuman sa maong programa.
Ang nanambong ug nanguna sa kalihukan mao ang mga kadagkoan sa regional offices sa Department of the Interior and Local Government (DILG) Bangko Sentral ng Pilipinas – Visayas Regional Office ug sa opisina ni 3rd District Kongresista Kristine Alexie B. Tutor.
Ang buhatan sa DILG girepresentahan ni LGOO VII Ma. Reina A. Quilas (Cluster Head, Cluster M&M – Bohol); sa Bangko Sentral ng Pilipinas – Visayas Regional Office ni Area Director Conrado B. Ragay; ug sa 3rd District sa Bohol ni Ms. Marites Gunday alang kang Kongresista Tutor.
Apil usab sa nisaksi sila si Bise-mayor Dondon Cometa ug mga sakop sa Sangguniang Bayan sa Valencia; mga department heads ug staff sa LGU Valencia; mga vendor sa merkado ug traffic operators; mga estudyante sa Valencia Technical‑Vocational High School; ug sa Mayor Pablo O. Lim Memorial High School.
Ang Paleng-Qr Ph Plus, usa kini ka programa nga gisuportahan sa Bangko Sentral ng Pilipinas ug DILG. Tumong niini nga mapalapad ang paggamit sa digital payment system sa mga merkado pinaagi sa pakigtambayayong sa mga partner nga: GCash, Palawan Pay, Maya, BPI Banko, Security Bank, LandBank, PNB, ug FCB.
Matod pa ni Mayor Balite, dako kini nga lakang padulong sa modernisasyon sa merkado sa Valencia. Mas mapadali, mapaspasan, ug mas luwas na karon ang pamaagi sa pagbayad para sa mga vendor ug sa ilang mga kustomer. (RTB)
