USA ka Bol-anon nga giila nga pinakataas nga lider sa Communist Party of the Philippines–New People’s Army (CPP-NPA) sa Negros ang apil sa duha ka rebelde nga napatay sa panag-engkwentro batok sa mga tropa sa gobyerno sa lungsod sa Binalbagan, Negros Occidental, sumala sa Philippine Army.
Giila ni Brig. Gen. Ted Dumosmog, commander sa 303rd Infantry Brigade, ang napatay nga si Reynaldo Erecre, alias “Amik,” nga gituohang secretary sa Komiteng Rehiyon–Negros sa CPP-NPA.
Matud sa kasundalohan, napatay si Erecre alas-4 sa hapon niadtong Biyernes, Enero 30, atol sa engkwentro tali sa mga rebelde ug sa mga sundalo sa 94th Infantry Battalion sa Barangay Bi-ao.
Gihulagway ni Dumosmog ang kamatayon ni Erecre isip dakong paghuyang sa kalihukang rebelde sa Negros. Samtang niini, gipaabot nga kuhaon sa igsoon ni Erecre ang iyang mga patayng lawas, subay sa pagkompleto sa beripikasyon sa identidad.
Gipadayag usab sa awtoridad nga nagpadayon ang koordinasyon sa pamilya ni Erecre, lakip na sa iyang igsoon nga si Roy Erecre, kinsa usa ka kanhi consultant sa National Democratic Front nga misurender kang Gobernador Erico Aristotle Aumentado sa lalawigan sa Bohol niadtong Nobyembre 2025.
Padayon ang imbestigasyon sa kasundalohan may kalabotan sa maong engkwentro samtang gipakusgan ang kampanya batok sa armadong rebelde sa rehiyon. (RTB)
