ANG DILG Bohol Provincial Office, ubos sa pagpanguna ni Provincial Director John Joan Mende, mipahigayon og pagtinaw ug klarong pagpasabot ngadto sa mga Local Government Operations Officers (LGOOs) kabahin sa DILG Memorandum Circular (MC) No. 2026-006, nga nagmando sa diha-diha nga pagtangtang sa ngalan, hulagway, ug dagway sa mga opisyal sa tanang proyektong ginapundohan sa gobyerno.
Matod ni PD Mende, gitigom na ang tanang LGOOs aron hisgutan ug masabtan ang sulod sa memorandum circular, aron masiguro ang husto ug parehas nga pagpatuman niini sa tanang lungsod ug siyudad sa lalawigan sa Bohol, lakip na ang pagtubag sa mga pangutana ug kabalaka sa mga local government units (LGUs).
Gipahinumdoman sa circular nga dili mahimong gamiton ang pondo ug mga ‘resources’ sa gobyerno alang sa personal nga promosyon o politikal nga interes. Busa, gimanduan ang tanang sakop nga opisyal ug empleyado sa gobyerno nga tangtangon dayon ang tanang signages, tarpaulin, marker, ug uban pang susamang materyales nga nagpakita sa ilang ngalan o hulagway, subay sa Section 5.2 sa maong circular.
Gitataw sa DILG nga ang tanang proyekto sa gobyerno iya sa katawhan, ug busa kinahanglan kini ipatuman uban ang neutralidad, accountability, ug etikal nga pagdumala sa tanang hugna sa proyekto—gikan sa pagplano, implementasyon, hangtod sa monitoring.
Sumala pa ni PD Mende, hugot ang paningkamot sa DILG Bohol nga masiguro ang hingpit nga pagsunod sa polisiya, ug gipasiugda nga ang tinuod nga public service mao ang matinud-anong pag-alagad sa katawhan, dili ang personal nga pagpakilala o pagpasikat.
Dugang niya nga nakatakda ang DILG Bohol sa paghimo og monitoring team aron bantayan ug masiguro ang hapsay nga pagpatuman sa DILG Memorandum Circular (MC) No. 2026-006 sa tibuok lalawigan sa Bohol. (RTB)
