GIPAGAWAS sa Bohol Association of Hotels, Resorts and Restaurants (BAHRR) ang usa ka seryosong pasidaan ngadto sa industriya sa turismo mahitungod sa usa ka bag-ong modus operandi diin gigamit sa pipila ka mga bisita ang hulga sa negatibong online reviews aron makakuha og libreng akomodasyon.
Sumala ni BAHRR President Doer Escoto, pinaagi sa nakuhang intelligence sa industriya ug internal nga beripikasyon, nasuta nga duna nay daghang establisimento ang nabiktima ug napugos sa paghatag og libreng lawak kaniadto aron lamang malikayan ang dautang publisidad.
Giklaro sa asosasyon nga base sa ilang pakisusi, kini nga mga insidente dili tinuod nga reklamo sa serbisyo kondili usa ka tinuyo nga tinguha sa pagpangilad ug pagpahimulos sa mga negosyo.
Samtang gihatagan og dakong bili sa BAHRR ang tinuoray nga feedback isip dalan sa paglambo sa ilang serbisyo, gipasiugda ni Escoto nga duna silay “zero-tolerance policy” batok sa bisan unsang matang sa review blackmail.
Pinaagi sa pagbarog sa ilang prinsipyo ug pagpaambit og impormasyon sa matag usa, tinguha sa BAHRR nga mapanalipdan ang integridad sa hospitality industry ug masiguro nga magpabilin kini nga lugar alang sa tiunay nga serbisyo ug matinud-anong apresasyon. (RTB)
