GIBANABANA nga mokabat og P6.3 milyones ang kinahanglanon aron sa pagpa ayo sa naguba nga dalan padulong sa Chocolate Hills, ug kini gastuhan sa Kagamhanang Probinsyal ug sa LGU Carmen.
Kini maoy gibutyag atol sa 4th Quarter meeting sa Provincial Disaster Risk Reduction and Management Council (PDRRMC) niadtong Disyembre 9 sa Ceremonial Hall sa Kapitolyo Probinsyal.
Ang P3 milyones pesos maoy mahimong share sa LGU Carmen, samtang ang lalawigan ubos sa liderato ni Gov. Aris Aumentado mao na ang mobayad sa P3.6 milyones aron makompleto ang pondo sa pag-ayo.
Ang maong dalan padulong sa bantog nga Chocolate Hills misamot og kadaut human sa kusog nga mga ulan ug bagyo kaniadtong nakalabayng mga semana. Wala kini’y insakto nga drainage canals, sidewalks, ug klaro nga slope protection, hinungdan nga dali kining naguba sa tubig ug erosion.
Kini nga mga kakulangan maoy sulbaron sa bag-ong proyekto. Gipasabot sa Office of the Provincial Engineer nga ang ayuhon nga bahin sa kalsada butangan na og: Steel reinforcements Drainage pipes ug lined canals Metal frames ug gratings Grouted riprap ug stone masonry Curb ug gutter 7 metros nga kalapdon, duha ka lanes, nga adunay 0.23 metros nga kabagaon sa semento Human matabunan sa bag-ong semento, kini molanat pa og 14 ka adlaw aron hingpit nga mogahi ug mahimong luwas gamiton.
Samtang magpadayon ang pagtrabaho, gilaraw sa mga tinugyanan nga ipadayon ang shuttle service sa Carmen alang sa mga mosaka sa Chocolate Hills, aron mas hapsay ang trapiko ug malikayan ang kalangan sa mga turista ug residente.
